Хитадтай харилсаа холбоотойгоор

 Энэ жэл нээлгын баяр ёһолол һая багшанарай колледждо болоо. Һуралсалай тус гу­ламтын захирал, багшын эрдэмэй дид-доктор Светлана Цыдыповагай хэлэһээр, Хитадай хэдэн дээдэ бо­лон дунда һургуулинуудтай харил­саа холбооной хэлсээнүүд баталаг­дажа, тэрэнэй ёһоор хамтын ажал ябуулагдадаг. Арбаад жэлэй саана Буряадай багшанарай колледждо һуража, ород хэлэтэй болоһон хитад олзын хэрэг эрхилэгшэд айлшаар буужа, баяраа хүргөө.

Тэдэнэй тоо­до Улаан-Үдэдэ «Мир» кафе баридаг Борис, туһалагша Сарюунатай ам­татай хитад эдеэн тухай хөөрөө, ха­руулаа. Сугларагшад хитад ороной соёлтой бүхыдөө танилсаа, мастер- классуудта хитадаар тооложо, иеро­глифуудаар нэрэеэ бэшэжэ һураа. Шэнэхээн нютагһаа гарбалтай, Бу­ряадай габьяата артист Лосолма Протасова баяр ёһололдо суглараг­шадые «Алтаргана» гэжэ дуугаараа хужарлуулаа. Буряадай багшанарай коллед­жын буряад хэлэнэй болон үндэһэн соёлой һалбариин 4-дэхи анги­ин оюутадай нэгэ бүлэг хитад хэлэ үзэдэг. Тэдэ шадаха мэдэхэеэ бэшэ оюутадтаа гэршэлээ, бэрхээр дуу­гардаг болоһоноо харуулаа. Буряад Улас Хитадтай улам нягтаар худал­даа-наймаа ябуулдаг байна. 2023 оной дүнгөөр, гадаадын наймаанай хахадынь хүршэ оронтой холбоотой гээд мэдэхэ болооб.

«Һонин гэхэдэ, Хитад орон дэлхэйн 9 сая 600 мянган дүрбэлжэн километр талмай эзэлнэ, ажаһуугшадынь 1 миллиард 411 сая гаран зон. Ород гүрэндэ 147 сая хүн ажаһууна, эзэлжэ байгаа дэбисхэрнай - 17 сая 100-гаад мянган дүрбэлжэн киллометр, Буряад Уласта сая хүрэхэгүй, тодорхойлбол, 974 мянган хүн, ажаһууна.