«Онтохоной ороноор аяншалга»

 Улаан-Үдэ хотын болбосоро­лой хорооной мэргэжэлтэн Гэрэлма Геннадьевна Дым­чиковагай хэлэһээр, хабаадагшад зүжэгүүдые буряад хэлэн дээрэ таби­на. Иимэ һонирхолтой хэмжээ ябуул­га Улаан-Үдэ хотодо оройдоол хоёр­дохи жэлээ үнгэргэгдэнэ гээд хэлэл­тэй. Хэды тиигэбэшье, олоной дура буляажа шадаа.

Мүнөө жэл урилдаанда хаба­адаха тухай мэдүүлгэнүүд юһэн һуралсалай гуламтаһаа ороо. Һонирхол татама зүжэгүүд харуулаг­даа гэжэ хүүхэлдэйн «Үльгэр» театрай уран һайханай хүтэлбэрилэгшэ Эр­дэни Жалцанов түрүүтэй шүүгшэдэй комисси абаһаар лэ мэдүүлнэ.

«Гэрхэн», «Ямаан ба шоно», «Мой­додыр», «Үнэгэн ба заряа хоёр» гэһэн ород онтохонууд буряадша­лагдаа. Буряад хэлэнэй багшана­рай, хүмүүжүүлэгшэдэй буряад ара­дай онтохонуудта хандаһаниинь һайшаалтай. Мүн өөһэдыньшье зохёоһон бүтээлнүүд харуулагдаа. Эдэ зүжэгүүдтэ 74 үхибүүн хабаадаа.

91-дэхи «Строитель» гэһэн хүүгэдэй сэсэрлигэй шабинар 3-дахи шатын дипломоор шагнагдаа. Эдир­хэн артистнууд «Гурбан луу тухай он­тохон» гэһэн зүжэг харуулаа.

- Сэсэрлигтэмнай нэгэ бүлэг үхибүүд монолингвальна шэглэлэ­эр буряад хэлэ үзэжэ байдаг. Эдэ хүүгэдээ зүжэгтэ хабаадуулаабди. Са­гаан һарын һайндэрэй үедэ гараһан луу жэл тухай зүжэг Оюна Очиров­на хүмүүжүүлэгшэтэеэ зохёогообди. Хүүгэдэймнай гэртэхин хэжэ байһан ажалыемни ходо дэмжэжэ байдаг. Манай бүлэгтэ ябадаг ород үхибүүд зүжэгтэ дуратайгаар хабаадалсаа, - гэжэ «Строитель» гэһэн сэсэрлигэй буряад хэлэнэй багша Жаргалма Шираповна Цырендашиева хөөрэнэ.

86-дахи «Оюна» сэсэрлигэй «Оюун» гэһэн театр 2-дохи һуури эзэлээ. Нёдондо тус театр 1-дэхи һуурида гараа һэн.

- Манай театр байгуулагдаһаар, хоёр жэл боложо байна. Хэдэн зүжэг табинхайбди. Үхибүүд театрта ябаха ехэ дуратай. Зүжэгүүдтэ наадахадаа, олон буряад үгэнүүдые мэдэжэ аба­даг, дуулажа, хатаржа һурана бшуу. Хубсаһаа үмдэхэдөө, нюур амаа бу­дахадаа, бүри гоёор рольдо ороно. Театрай дэргэдэ хэдэн хүн хүдэлнэ. Эдэ хэд бэ гэхэдэ, буряад хэлэнэй багша, хүмүүжүүлэгшэ, хүгжэмэй баг­ша, уран зурааша, хубсаһа хунар бэл­дэдэг хүнүүд, - гэжэ «Оюна» сэсэрли­гэй буряад хэлэнэй багша Дулма Цы­деновна Нимаева хөөрэнэ.

Нёдондо шангай 2-дохи һуури эзэлһэн 97-дохи «Земляничка» сэсэр­лигэй шабинар мүнөө жэлдэ түрүү һуурида гараа. Хун шубуун тухай түүхэ домог дээрэ үндэһэлһэн Хоридой мэргэн тухай онтохо тэдэ харуулаа. Гол роль 6 наһатай Макар Михалёв шадамар бэрхээр гүйсэдхэһэн байна.

- Ехэ һонирхожо энэ зүжэгтэ на­адааб. Тайзан дээрэ гараад, абаһаар лэ бэеэ харуулхаяа һанааб. Зүжэгэй эхиндэ би загаһашалжа һуугааб. Удаань гурбан хун шубуудай ниидэ­жэ ерэхэдэнь, хоргодооб. Һүүлдэнь манай 11 үхибүүд тайзан дээрэ гараа, - гэжэ зүжэг тухай Макар Михалёв хөөрэнэ.

Буряад хэлэнэй багша Цын­жидма Золтоевна Антагарова хүмүүжүүлэгшэдтэй хамта «Земля­ничка» сэсэрлигэй ахамад болон бэ­лэдхэлэй бүлгэмэй хүүгэдые зүжэг наадуулжа һургана.

Улаан-Үдэ хотын 8-дахи һургуулиин шабинар мүн лэ энэ урилдаанда хабаадаа. Туяна Мунко­жаргаловна Намдакова, Светлана Валерьевна Зодбоева багшанарай ударидалга доро Бавасан Абидуе­вай «Тэхэ Бабана» гэһэн зүжэг 8-дахи һургуулиинхид бэлдээ. Тиигэжэ тэдэ 1-дэхи шатын дипломдо хүртэһэн байна.