Урданай һайндэр

 Эмхидхэгшэд «Һайн хүршэнэрэй гу­дамжа» гэһэн түсэлэй шугамаар үндэһэтэнэй хубсаһатай зоной гэрэл зурагаа абхуулха сесси үнгэргэбэ. Айлшад Дунда Азиин, Поволжиин үндэһэн соёлой үзэсхэлэн хараба, зүүн зүгэй амтан эдеэ тур­шаба. Хабаадагшадта мастер-классууд, этно­тур эмхидхэгдээ, гадна нэгэ үндэһэ гарбал­тай зон арадайнгаа эдеэ хоол бэлдэжэ, айл­шадые хүндэлөө, энэ үдэр үнгэргэгдэдэг ёһо заншалнуудтай танилсуулаа.

- Манай уласта хэдэн шажан мүргэлтэн, олон яһатан ажаһуудаг, тиимэһээ харуулха юумэн элбэг. Бидэ булта эбтэй эетэй ажаһуудагбди. Арадуудай хани барисаанай байшанай 1-дэхи ба 2-дохи дабхарнуудта «Һайн хүршэнэрэй гудамжа» түсэлэй шуга­маар хэмжээ ябуулганууд үнгэргэгдэжэ эхил­хэнь. Эндэ дулаахан оршон байгуулагдаа, би­дэнэй сэдьхэл баяраар халина. Арадуудай түлөөлэгшэд соёлоо харуулха. Иимэ оршон бидэниие хүгжөөнэ, бидэ бэе бэетэеэ харил­сажа, бэе бэеэ хүндэлжэ һуранабди, арадуудай соёлтой дүтэ танилсанабди, - гэжэ Буря­ад Уластахи Россиин арадуудай нэгэдэлэй түрүүлэгшэ Сажида Баталова тэмдэглэбэ.

Арадуудай хани барисаанай байшан­да үхибүүдтэ зорюулагдаһан программа үнгэргэгдөө. Тиихэдэ «Наврузай үедэ сахидаг бүлын заншалнууд» гэжэ үхибүүдэй зурагуу­дай ба бүтээлнүүдэй үзэсхэлэн дэлгээгдээ.

Һайндэр «Наврузай аялганууд» гэжэ тоглолтоор түгэсөө. Эндэ үхибүүдэй бүлгэмүүд наада харуулба. Тоглолтын үедэ һайндэрэй заншалнууд тухай видео- ролигууд дамжуулагдаба, тиихэдэ «Кар­га боткасы – грачиная каша» гэжэ түүрэг арадуудай урданай ёһолол харуулагдаба. Мүнөө жэл нэгэ үндэһэ гарбалтай зон үхибүүдтэ зүүн зүгэй амтан эдеэнэй 150 үлхөө бэлэг бэлдэбэ. Эхэ ороноо хамгаалжа, сэрэгэй тусхай операцида хабаадажа байһан Хяагтын гарнизоной сэрэгшэдэй үхибүүдтэ 75 бэлэг дамжуулагдаа. Үшөө 75 бэлэг һайндэртэ ерэһэн үхибүүдтэ эмхидхэгшэд барюулаа. Арадуудай хани барисаанай байшанда үнгэргэгдэһэн хэмжээ ябуулга Буряад Ула­сай Толгойлогшын ба Засагай газарай Захир­гаанай Яһатанай хоорондын харилсаанай ба эрхэтэдэй үүсхэлнүүдые хүгжөөлгын хороон, Вагжановай нэрэмжэтэ соёлой байшан, хата­рай «Байкал-Идель» һургуули, Улаан-Үдэ хо­тын «Колокольчик» гэжэ үхибүүдэй сэсэрлиг дэмжэбэ.