Барилгын бэлэдхэл эхилбэ

 -Юрэнхылэгшын даабаря­ар, Россиин түмэр харгы ба «Бамтоннельстрой- Мост» Северомуйскын 2-дохи тон­нель барилгын хэлсээ баталаа. Энэ үргэн дэлисэтэй түсэл гүрэнэй ба Буряадай экономико хүгжөөлгэдэ ехэ удха шанартай. Дэлхэйн хэмжээ­нэй түсэлэй бэелүүлэгдэжэ эхилһээр амаршалнаб. Бүхы юумэн һайнаар бүтэхэ, этигэнэб,- гэжэ Буряадай Тол­гойлогшо тэмдэглэбэ.

Суглаанай урда Алексей Цыденов Алексей Дружинин хоёр албанай хэрэгээр Муяын аймаг ошожо, Се­веромуйскын тоннель хараа, түмэр харгын ажалшадтай уулзаа. Удаань Улаан-Үдын түмэр харгын унаагай колледждо багшанартай ба оюутад­тай уулзалга үнгэргөө. Колледжын бэлдэн гаргаһан мэргэжэлтэд Зүүн зүгэй түмэр харгын буудалгын тал­майн улам хүгжэхэдэ, Северомуй­скын 2-дохи тоннель барихада, улам эрилтэтэй болохонь дамжаггүй.

- Мүнөөдэр Северомуйскын тон­нель ашаа зөөлгын бүхы эрилтэ ханганагүй. Бидэ түсэл бэелүүлжэ эхилээбди, тиимэһээ урагшаа томо алхам хэгдэбэ гээшэ. Түмэр хар­гын унаада шухала барилга эхил­бэ. Энэ хэрэгтэ туһаламжа үзүүлхэ бэлэн байһанаа мэдүүлнэб, - гэжэ Алексей Дружинин хэлэбэ. Северомуйскын 2-дохи, Кода­рай 2-дохи, Кузнецовскын 2-дохи тоннельнүүдые, Амур мүрэн дээгүүр гараха шэнэ хүүргэ бари­ха тухай «Бамтоннельстрой-Мост» компаниин ба Россиин түмэр хар­гын хэлсээн мартын 30-да бата­лагдаа. Барилга 2032 оной эсэс болотор үргэлжэлхөөр хараалагда­на. Барилгада 498,8 млрд түхэриг гаргашалагдаха гэжэ уридшалан тоологдобо. Объектнүүдэй аша­глалда тушаагдахадань, БАМ- аар ба Транссибаар 270 сая тон­но хүрэтэр ашаан шэрэгдэхэ. Буряадай Толгойлогшо Северомуй­скын тоннель барилгын үедэ саг үргэлжэ хүдэлхэ штаб бүридхэхэ да­абари үгэбэ. Штабта Буряад Уласай яамануудай ба агентствэнүүдэй, Россиин түмэр харгын, Росрее­стрэй, Дотоодын хэрэгүүдэй яама­най болон бэшэшье засагай зурга­ануудай түлөөлэгшэд оролсохо юм.

Буряад Уласай Эд зөөриин ба газарай харилсаануудай яаманда, Буряад Уласай Байгаалиин нөөсын ба байгаали хамгаалгын яаманда, Ойн ажахын Улас түрын агентствэдэ ажалда хүлһэлэгшэдэ барилгын га­зар түргэн хубаарилжа үгэхыень да­алгагдаба.

- Алексей Самбуевич, дэмжэл­тэ үзүүлһэнэйтнай түлөө баяр хүргэнэбди. Алексей Александро­вич, танда мүн лэ баяр хүргэнэбди. Северомуйскын тоннель бариха бэлэмди. Манда бэшэ асуудал үгы, - гэжэ «Бамтоннельстрой-Мост» ак­ционернэ бүлгэмэй захиралнуудай Зүблөөнэй түрүүлэгшэ Руслан Бай­саров хэлэбэ.