Алас Дурнада - анхарал

Конкурсдо хабаадахын тула Алас Дурнаар аяншалһан ту­хай богонихон фильм буулга­жа, https://путешественникдв.рф сай­таар шүүгшэдэй үзэмжэдэ эльгээхэ хэрэгтэй. Конкурс удаадахи янзануудаар үнгэргэгдэхэ:

- Гран-при (эрхим аяншалга);

- ябагаар аяншалга (аглаг тайгаар ябагаар, велосипедээр аяншалга);

- уһан дээгүүр аяншалга (голоор уруудалга, далайгаар, уһан доогуур аяншалга, серфинг);

- үбэлэй аяншалга (санаар га­зар үзэлгэ, нохой хүллөөд аяншалга, үбэлэй веломаршрут, сноубординг).

Алас Дурнын шэнэ газарнуудые нээһэн аяншалагшадта шүүгшэд онсо анхаралаа хандуулха. Наһаа хүсэһэн зонһоо гадна ехэшүүлэй ударидалга доро 10-һаа дээшэ наһатай үхибүүд тус хэмжээ ябуул­гада хабаадаха аргатай. Конкурсдо мэргэжэлтэ фильмһээ гадна юрын гарай утаһанай буулгабари эльгээ- хэдэ болоно. Илагшадай эрхим хүдэлмэринүүд можо хизаарнуудай теле-субагуудаар дамжуулагдаха, Алас Дурнаар аяншалгын замуудай интерактивна картада оруулагдаха.

– Эдэбхитэйгээр аяншалха гээшэ зүб шиидхэбэри. Миин хэбтээд амар­хада, хүнэй ажабайдал хубилхагүй, һайн юумэ асархагүй. Харин байгаа- лиин энгэртэ гаража, түүдэг носоо­ходоо, майхан табихадаа, шадалаа тухайлан бодоходоо, хүн хүсэтэй, бата этигэлтэй болоно, - гэжэ Алас Дурнын тойрогоор Оросой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев хэлэбэ.

Конкурсын түрүүшын хаһада Алас Дурнаар аяншалга тухай 200 гаран фильм шүүгшэдэй үзэмжэдэ табигдаһан байна, тэрэ тоодо Буряад оронһоо - 12. Дүнгүүдынь 2023 оной ноябрь һарада «Россия» гэжэ улас­хоорондын үзэсхэлэн-хуралдаанай үедэ согсологдоо һэн.

Буряад ороной ажаһуугша Ни­кита Суханов «Алас Дурна - уршаг­та ябадалнуудай газар» гэжэ 1-дэхи конкурсын «Уһан дээгүүр аяншалга» янзада 2-дохи һуури эзэлээ һэн. Тэрэ нэгэ үдэрэй туршада Саяан хада ба Хамар-Дабаан зубшажа, хадын Эрхүү голоор уруудан аяншалһан байна.

Конкурс Юрий Трутневай үүсхэлээр, Россиин Зүүн зүгые хүгжөөлгын яаманай, «Алас Дурные ба Арктикые хүгжөөлгын корпораци» гэһэн акционернэ бүлгэмэй, «Ниигэ­мэй үүсхэлнүүдые хүгжөөлгын жаса» гэжэ аралжаанай бэшэ нэгэдэлэй дэмжэлгээр үнгэргэгдэнэ