Шэнэ байшан нээгдэбэ

 Һууринай ажаһуугшадай удаан хүлеэһэн байшан дотор эдеэнэй газар ба кабинедүүд байха юм. Һурагшад мүнөө сагай эрилтэдэ таараһан оршондо ном үзэхэ, харин һургуулиин хүтэлбэри, баг­шанар тэдээндэ шанартай эрдэм мэдэсэ үгэхэ зорил­готой.

- Хүндэтэ үхибүүд, ном­доо һайнаар һуража, бүхы юумэндэ шадамар бэрхэ боложо ябагты. Бүхы харгынууд урдатнай нээгдэжэ, бэрхэ, жаргалтай зон бо­лохыетнай хүсэнэб. Шэнэ байшанай нээгдэһээр амаршалнаб. Бэрхээр һурагты, зу­найнгаа амаралта һайнаар үнгэргэгты, бэе бэетэеэ эб­тэй байгты. Бүхы һайниие таанадта хүсэнэб! - гэжэ Алексей Цыденов үхибүүдтэ хандаба.

Мухар-Шэбэрэй 2-дохи һургуули хоёр блогһоо бүридэнэ. Гол байшаниинь хирпиисээр баригданхай, харин залгагдаһан модон байшан 1 дабхартай байгаа. Тэрэнэй һуурида шэнэ кор­пус баригдажа, ашаглалда тушаагдаба.

Тамирай ба актова зал­нууд, эдеэнэй газар, 75 һууритай гурбан класс зал­гагдамал шэнэ байшан соо байха. 1-дэхи дабхарта 250 хүниие багтаадаг эдеэлхэ га­зар, эдеэ бэлдэдэг таһагууд зохёогдоо, харин 2-дохи дабхарта ород хэлэнэй ба литературын, математикын, түүхын кабинедүүд, багша­нарай таһаг, жорлон бай­ха юм. Кабинедүүд тааруу зохид эд бараагаар, мүнөө сагай техникээр хангагдаа. Байшан дотор лифт бии. Харин оршон тойронхи га­зарынь болбосон түхэлтэй болгогдоо. «Болбосорол» гэжэ үндэһэтэнэй түсэлэй аша туһаар баригдаһан шэнэ байшанда 117 сая түхэриг һомологдоһон байна.

Буряад Уласта 2017 онһоо 2023 оной декабрь болотор үндэһэтэнэй түсэлэй, бэшэ­шье программануудай шу­гамаар 12 084 һууритай 35 һургуули баригдажа, аша­глалда тушаагдаа. Оросой Холбоото Уласай Юрэнхы­лэгшэ Владимир Путинай шиидхэбэреэр, Оросой Хол­боото Уласай Засагай газа­рай дэмжэлгээр иимэ олон һургуулинууд бодхоогдоо. Байгша ондо 1738 һууритай үшөө табан һургуули нээг­дэхэ. 2017-2024 онуудта дүн хамта 40 һургуули баригда­ха, 13822 һуури байгуулагда­ха. Хүрэнгэжүүлгын хэмжээн 22,5 млрд түхэриг болоно.