Алексей Цыденов: «Байгалай загаһашалга» Буряад Уласай бренд болоо»

Мартын 29-дэ Турка һууринда жэл бүри эмхидхэгдэдэг заншалта «Байгалай загаһашалга-2025» түгэсэбэ. Тус хэмжээ ябуулга 19-дэхиеэ үнгэргэгдэжэ, манай гүрэнэй элдэб булангуудһаа үбэлэй загаһа бариха дуратай зониие олоор суглуулаа. Буряад Уласай Толгойлогшо Алексей Цыденов хүндэтэ айлшан, Россиин арадай артист Александр Домогаровтай хамта хэмжээ ябуулгада хабаадаба.

- Байгалай загаһашалгада ерэһэн та бүгэдэниие мэндэшэлнэб. Манай хэмжээ ябуулга Буряад Уласай бренд болоо. Эндэ сугларагшад бэе бэетэеэ танилсажа, байгаалитай, манай агууехэ Байгал далайтай харилсахаяа, урма зоригоороо хубаалдахаяа, элшэ хүсэ абахаяа ерэнэ. Би таанадые амаршалнаб! Удаадахи жэлдэ ойн баярай  ХХ-дохи «Байгалай загаһашалга» үнгэргэгдэхэ. Бүри үргэн дэлисэтэйгээр тэрэниие эмхидхэхэбди, - гэжэ Буряадай Толгойлогшо хэлэбэ.

Мүнөө жэлэй хэмжээ ябуулгада Россиин элдэб хотонуудай 215 команда хабаадаба. Хүршэ Монгол оронһоо 2 команда ерээ. Тиихэдэ элдэб наһанай зон загаһа барихаяа ерээ. Эгээ үндэр наһатай хабаадагша - 78-тай, эгээ залуу хабаадагша 5 наһатай байба.

 Буряад Уласай Толгойлогшо Алексей Цыденов «Титан» компаниин генеральна захирал Вадим Бреднийдэ Байгалай загаһашалга үндэр хэмжээндэ эмхидхэһэнэйнь түлөө баяр хүргэбэ.

- Вадим Витальевичта үшөө дахин баяр хүргэхэ байнаб. Энэ хэмжээ ябуулга 19-дэхиеэ үнгэргэгдэбэ. Эмхидхэлэй ба мүнгэн зөөриин талаар бүхы ажал Вадим Бредний бэе дээрээ даажа абадаг, - гэжэ Алексей Цыденов тэмдэглэбэ.

Россиин арадай зүжэгшэн Александр Домогаров Байгалай загаһашалгада хүндэтэ айлшанаар буугаа.

- Үсэгэлдэр ехэ гоё уулзалга болоо. Удаань бидэ Байгал далайда ерэжэ, тугуудые үргөөбди, хэмжээ ябуулга баярай оршон байдалда нээгээбди. Харин мүнөөдэр үглөөнэй 8 сагта загаһа барилгаар мүрысөөн эхилээ. Ехэ гоё юумэн болоо, - гэжэ Александр Домогаров хубаалдаба.

Энэ жэлэй хэмжээ ябуулгада хабаадагшад дүн хамта 56 кг загаһа баряа. 2 844 грамм загаһа бариһан Улаан-Үдын «Хотын маршрудууд» эмхиин «Авторитеты руля» гэжэ команда гол шанда хүртөө. «Лада 4х4» түхэлэй автомашина илагшадта барюулагдаа. Буряад Уласай Мухаршэбэрэй аймагай «Старики-разбойники» команда 2-дохи һуури эзэлээ. Тэдэ 2 811 грамм загаһа барижа, «Ямаха» онгосо шүүгээ. «ТЭСМ» команда 2787 грамм загаһа барижа, хиигээр дүүргэгдэдэг онгосодо хүртэбэ.

Барнаул, Кемерово, Новосибирск хотонуудай «Сибириин басагад» гэжэ эхэнэрнүүдэй команда 844 грамм загаһа барижа, булта Сочи ошохо путёвко шүүгээ.

«Сэрэгэй тусхай үйлэ хэрэгүүдтэ хабадагшадта туһаламжа» гэһэн амяараа янзада 500 000 түхэригэй үнэмшэлгэ «Боевое Братство» эмхиин түлөөлэгшэдтэ барюулагдаа. Мүнгэн зөөри сэрэгшэдтэ эльгээхэбди гэжэ тус эмхиин түлөөлэгшэд хэлэбэ.

Заншалта ёһоор «Тон гоё хубсаһатай команда», «Эрхим бүлэ», «Эгээ үндэр наһатай хабаадагша», «Эгээ залуу хабаадагша» ба «Эгээ томо загаһа бариһан хабаадагша» гэһэн янзануудта урмашуулгын шангууд барюулагдаа. Мүрысөөнэй айлшадта, хабаадагшадта Буряад Уласай зүжэгшэд, уран һайханай коллективууд соёлой программа дурадхаа. Хэмжээ ябуулгын үедэ гарай бэлэгүүдэй наймаа эмхидхэгдээ, эдеэ хоолой газарнууд хүдэлөө.