​Түмэнэй түрүүдэ

Энэ үндэр хэмжээндэ Буряад Уласаймнай түрүү багша ба хүмүүжүүлэгшэ хабаадажа, эрхим дүнгүүдые харуулба. Улаан-Үдэ хотын 67-дохи “Подснежник” гэһэн хүүгэдэй сэсэрлигэй багша Баирма Цыреновна Гумпылова түрүү табан бэлигтэйшүүлэй тоодо ороһон байна.

Иимэ үргэн дэлисэтэйгээр бүхэроссиин хэмжээнэй конкурс яагаад болодог бэ гэжэ Буряадта һайнаар мэдэдэг. Ушар гэхэдэ, нёдондо манай улас тус хэмжээ ябуулгые угтан абаа бэлэй. Гэхэтэй хамта “Эрхим багша” гэһэн конкурс Буряадта 20 гаран жэлдэ үнгэргэгдэдэг заншалтай. Харин Орос гүрэн дотор иимэ түхэлэй конкурс һаяхана, 2022 онһоо эмхидхэгдэжэ эхилээ һэн. Мүнөө жэл тус хэмжээн табан жэлэйнгээ ойн баярые угтаба.

Орос гүрэнэй болбосоролой сайд Сергей Кравцовой дуулгаһаар, 2022 ондо болоһон түрүүшын конкурсдо 69 багша хабаадаа һэн. Харин мүнөө Липецкдэ 87 можо хизаарай 131 хүн ерээ. Табан жэлэй хугасаада хэмжээ ябуулгада хабаадагшад 47 үндэһэн хэлээрээ хэшээлнүүдые үнгэргэжэ, үхибүүдые һургадаг байна. Манайшье үндэһэн буряад хэлэн дээрэ заадаг багшанар конкурсдо амжалтатайгаар хабаададагынь баярламаар. Энэшье удаа Буряад Уласые хоёр багша түлөөлһэн байна. Улаан-Үдэ хотын 67-дохи “Подснежник” гэһэн хүүгэдэй сэсэрлигэй багша Баирма Цыреновна Гумпылова, 29-дэхи буряад гимназиин багша Арюна Рабдановна Цыжипхенова гэгшэд Буряадтаа түрүүлжэ, Липецк ошохо эрхэдэ хүртөө бэлэй.

Бүхэроссиин конкурсын шүүгшэдэй тоодо мүн лэ Буряадаймнай түлөөлэгшэд оролсоо. “Бэлиг” түбэй захирал Баир Дашеевич Балданов, БГУ-гай багша Оксана Александровна Дареева гэгшэд бүхы Орос гүрэнэй эрхим багшанарай ажабайдалтай танилсажа: “Хабаадагшад булта бүхы шадалаа харуулаа, дүй дүршэлөөрөө хубаалдаа: шадаа һаа бултандань “табые” табиха байгаабди”, - гээд, тэмдэглэнэд.

Түрүүшын хоёр шатада бүхы 131 хабаадагша дүршэлөө харуулаа. Удаадахи шатада оройдоол 30 хүн гараа. Энэ 15 багша ба 15 хүмүүжүүлэгшэ болоно. Буряадые түлөөлһэн багшанар тэдэнэй тоодо оролсожо, бүхы нютагаархинаа баярлуулаа. Үшөө хоёр шатын һүүлээр таба-табан эрхим багшанар үлэһэн байна. Хүүгэдэй сэсэрлигэй мэргэжэлтэдэй тоодо Баирма Цыреновна Гумпылова нэрлэгдээ. Татарстан, Башкортостан Уласуудай, Санкт-Петербург хотын, Воронежско можын түлөөлэгшэд энэ шатада хүрэһэн байна. Багшанарай дунда Татарстан, Крым, Саха (Яхад), Карели Уласуудай, Липецкын можын эрхим табанай тоодо ороһон байна.

Сентябриин 11-дэ “Казаки России” гэһэн хатарай гүрэнэй театрай байшан соо эрхим багша ба эрхим хүмүүжүүлэгшэ нэрлэгдээ. Хүмүүжүүлэгшэдэй дунда Башкортостан Уласай башкир хэлэ заадаг Альбина Шарипова эрхим гэжэ нэрлэгдээ. Багшанарай дунда Карелиин Уласай вепсскэ хэлэнэй багша Глеб Фомин түрүүлээ. Тиимэһээ удаадахи бүхэроссиин конкурс Петрозаводск хото угтан абаха болобо.

Хүмүүжүүлэгшэдэй дунда шангай һууринуудые Санкт-Петербург хотын Екатерина Смирнова, Татарстан Уласай Алсу Галиева эзэлээ. Багшанарай дунда Татарстан Уласай Резида Курмашина, Саха (Яхад) Уласай Надежда Очирова гэгшэд шангай һууринуудта гараа.

- Саха (Яхад) Уласай багшын обогыень дуулаад, буряад басаган гэжэ һанаабди. Нерюнгриин аймагай эвен угтай багша байшоо. Бидэнэртэй танилсаад баярлаһан байна. Юуб гэхэдэ, наһанайнь нүхэр буряад хүн гээшэ, Загарайн аймагһаа угтай. Хоёр үхибүүтэй, тэдэнээ эвен ба буряад хэлэн дээрэ һургаха гэжэ оролдонобди гэжэ хэлээ. Өөрөө Надежда Максимовна хүүгэдтэеэ хамта буряад хэлэ сээжэлдэнэб гэһэн байна. 20 жэл соо эвен хэлэ ба уран зохёол заана. Нерюнгри хотын “Арктика” гэһэн интернат-һургуулида багшаар хүдэлнэ, - гэжэ Оксана Дареева хөөрэнэ.

teacher.natlang.ru сайтһаа гэрэл зураг