Эгээл түрүүшын...

Сентябриин 1-дэ һуралсалай шэнэ жэл эхиеэ абажа, олон хүүгэд энэ талаар түрүүшынгээ алхамуудые хэжэ байнхай. Мүн дундашье, дээдэшье һуралсалай гуламтануудта ажабайдал хүүежэ эхилбэ ха юм. Мэргэжэлтэй боложо гараһан хүбүүд, басагад хүнгэн бэшэ ажабайдалда намтарай дэбтэр соо түрүүшынгээ баримта бэшүүлбэ. Энэ ушарһаа боложо, анха түрүүшынгээ амжалта, хэһэн ажал тухай хөөрэхые асуултада хабаадаһан хүнүүдһээ һонирхобобди.

Цырендоржын Чингисэй Нима, Мухар-Шэбэрэй аймагай Галтайн һургуулиин захирал, буряад хэлэнэй ба уран зохёолой багша:

- Буряадай үндэһэтэнэй 1-дэхи интернат-һургуулиин һүүлээр Буряадай гүрэнэй багшанарай дээдэ һургуули дүүргэжэ гарааб. Минии дүүргэхэдэ, гүрэн дотор хубаарилга үгы болоод байгаа. Тиимэһээ сүлөөтэйхэнөөр шэлэһэн мэргэжэлээрээ хүдэлхэеэ түрэл нютагаа ошоо һэм. Тиимэ ехээр үлүү гараха үхибүүдээр дайралдаагүйб. Хуу барантайнь хэлэеэ ойлголсоод, хүдэлжэ эхилээб. Мүнөө 30 гаран жэлдэ һургуулидаа ажал хэнэб даа.

Мунко Цыдыпов, барилдаагаар уласхоорондын классай спортын мастер:

- Би өөрөө Агын Буряадай тойрогой Догой нютагһаа уг гарбалтайб. Түрэл нютагтаа һураа һэнби. 7-дохи класста һуража байгаад, түрүүшынгээ амжалта туйлааб. Тиихэдэ медаль үгэдэггүй һэн, нэгэ жетондо адли юумэ 3-дахи һууриин түлөө абаа һэм. Суглуулагдамал командын бүридэлдэ эгээл һүүлшын тамиршан боложо оруулагдаа һэм.

Шэтэ можын мүрысөөндэ аяар холын Бухачача һуурин ошоо һэмди. Могойтоһоо поездоор Карымское хүрөөбди, удаань Чернышевск хүрэтэр ябаабди. Тэндэ үшөө нэгэ дахин поезд һэлгээбди. Командаараа бидэ гурбан хүбүүд шангай 3-дахи һуури эзэлээбди. Манай урда ганса Шэтэ хотын наадагшад ороо. Басагаднай командаараа тиихэдэ илалта туйлаһан байна. Энэ хадаа шэрээгэй теннисээр мүрысөөн болоно. 7-дохи класста үшөө барилдажа туршаашьегүй ябааб.

Амгалан Солбонович Ринчинов, Оросой Уран зураашадай холбооной гэшүүн:

- Уран зураашадай гэр бүлэдэ түрэһэн хадаа тон багаһаа зуража һураһан байнаб. Хоёр наһатайдаа зуража эхилээш гэжэ намда хэлэдэг, тэрээниие би һанадаггүйб. Нэгэ дахин абынгаа ажал дээрэ биирээр будажархёо һэм. Тэрээнииемни аршангүй, зураг дээрэнь үлөөжэрхиһэн юм. Гурба наһатайдаа зуража байһанаа һанадагби. Эжымни ба эгэшэмни намайе һургаа. Түхэреэлжэ зураад, хажуугаарнь палочкануудые табяад, хүнэй дүрэ түрүүн зурагша һэм. Таба наһатайдаа бэрхэ зурадаг болоод байгааб. Нэгэ ажалыемни үзэсхэлэндэ табяа һэн. Үхибүүдэй конкурсын дүнгөөр шагналда хүртөөб, тиихэдэ долоотой болоод ябааб. Хэды тиигэбэшье намһаа аха шалгарһан зураашадые “Артек” лагерь эльгээгээ, харин намайе бага байнаш гээд абаагүй.

Серафима Пурбуевна Очирова, Буряадай журналистикын ветеран:

- Үшөө һургуулиин шаби байгаад, Буряадай радиодо ерээд, түрэл Гэльбэрынгээ һургуулиин овощ таридаг хүбүүд, басагад, багшанар тухайгаа хөөрөө һэм. Нэгэ үдэр һуралсалаймнай гуламтын захирал “Восход” мотоциклаар ерээд, “Очирова, ябая!” - гээд һуулгаад, һургуулидаа асараа. Пионервожатые дуудажа: “Та хоёр Буряадай радиодо ошожо, бригада тухай хөөрэхэт”, - гэжэрхёо һэн. 2-3 хуудаһан дээрэ текст дары түргөөр зохёогооб. Радиодо тэрээниие уншахадаа, һанаагаа зобоогүйб, үгэнүүдээ мартана гүб гэжэ байгаад айһанааһанадаггүйб. Радиогой сурбалжалагша намайе магтаа һэн. “Бусад һонинуудые маанадтаа бэшээд эльгээжэ, асаржа байгаарай”, - гэжэ хэлэхэдэнь, долоон хоног бүхэн эльгээдэг болошооб.

Эрхүү хотодо сурбалжалагшын мэргэжэлдэ һурахаяа ябахадамни, радиодо гараһан мэдээсэлнүүдни ехэ туһа хүргөө.