Буряад Уласта бог шорой хэр арилгагданаб?

Арад зоной ажамидаралай хойшолон хог, бог гээшэ һүүлэй хэдэн жэлэй туршада амаргүй ехэ зоболон боложо байна. Хэдэн жэлээрээ үмхирхэгүй хууха амһарта, целлофан орёолто газар дэлхэйе дүүргэжэл байна. Эхэ байгаалияа энэ зандань үлөөхэ гэжэ хэды оролдоошье һаамнай, үрэ дүн балай харагданагүй. Хүгжэнги гүрэнүүдтэ гаргаһан хогоо илгажа суглуулаад, тэрэнээ үгы хэхэ, алибаа дахин хэрэглэхэ арга түхеэрэгдэнхэй бшуу. Харин манай гүрэндэ хогоо бултыень суглуулаад, полигон дээрэ абаашажа буладаг заншалһаа үшөө һалаадүй байнабди. Хэдэн жэлэй урдахана Буряад Уластамнай «ЭкоАльянс» гэһэн эмхи ажаллажа эхилээ һэмнай даа. Тэрэ гэһэнһээ хойшо бог шорой хэр арилгагданаб? Энэ талаар юумэн һайн тээшээ болоо гү гэжэ Улаан-Үдын болон аймагуудай ажаһуугшадһаа асууһан байнабди.

Соёлма Бадмаева, ПВЗ-дэ ажаһуугша:

- Манай ажаһуудаг ПВЗ гэжэ газарта үлэгдэл абаашаха талаар бүри муу болоо. Энэнь юунһээб гэжэ бодолгото болоһон байнаб. Нажарай эхиндэ бидэнэй ажаһуудаг болон хажуудахи гэрнүүдые хангажа байдаг коммунальна ажахы үгы хэгдээ һэн. Орондонь УК «Сплав» гэдэг эмхи ороо. Урид байһан эмхиин байхада, бог суглуулдаг амһартануудай хажуугаар нэгэшье үлэгдэл үгы - сэбэр байдаг бэлэй. Харин мүнөө үдэр бүхэндэ саг соогоо хог абаашагдадагшье һаа, хажуугаарнь тараһан элдэб үлэгдэл дүүрэн. Модоной набшаһалжа байха үедэ тайрагдаһан мүшэрнүүд, бүри бүхэли модоншье тайрагдаад ябталаатай зандаа мүнөө болотор тэбхыжэ харагдана. Түрүүн ажаллажа байгаа эмхиин ажалшад өөрынгөө уялгануудые һайнаар дүүргэдэг байгаа гээд харагдана. Харин энэ шэнээр байгуулагдаһан УК «Сплав» гэһэн эмхиин ажалшад тон муугаар ажалаа хэнэд.

Лариса Егорова, зүжэгшэн:

- Бидэ өөрынгөө эмхиин зүгһөө «ЭкоАльянстай» хэлсээ баталанхайбди. Долоон хоногой 2 дахин ерэжэ абаашадаг. Манай зүгһөө тэдээндэ ямаршье гомдол үгы. Тиигэбэшье Улаан-Үдэ хото соогуур ябахада, хүнэй хойноһоо үлэһэн хог амаргүй ехэ байна даа.

Кристина Маланова, 18-дахи кварталай ажаһуугша:

- Намартаа иишээ һая нүүжэ ерээд байхадамнай, бог шоройн амһартанууд ходол дүүрэн байдаг һэн. Тиигээд хэдэн һарын үнгэрөөд байхадань, нэгэ анхаран гэхэдэмни, яһала сэбэр болошоод байгаа. Мүнөө үдэр бүхэндэ ерэжэ абаашадаг. Һая ерээд байхадамнай, бог абаашадаг автомашина юумэниинь, магад, эбдэрһэн байжа болоо.

Татьяна Убушеева, Солдатский һууринай ажаһуугша:

- Манай ажаһуудаг Солдатский болон захадахи Поселье һууринуудта урид үйлсэ талаар дүүрэн хог байгша һэн. Харин мүнөө гэр гэрээр ябажа, бог абаашадаг болоһонһоонь хойшо сэбэр болоо. Мүнөө айл бүхэн газаагаа хайрсаг бүтээжэ табинхай - тэндээл суглуулдагбди. Урид зарим улад тусхай газарта абаашажа хаяхагүй - хүршынгөө хорёогой саана ороод, харшын доогуур хаяжархихадань, зайгуул нохойнууд талаар дүүрэн тараажархидаг байгаа бшуу.

Наталья Гармаева, 20-дохи кварталда ажаһуугша:

- Бидэ эндэ 3 жэлэй туршада ажаһуунабди. Бог шорой гаргаха талаар эндэ балай ядалданагүй. Урид хэдэн жэлэй туршада «Сосновый бор» гэһэн сэрэгэй хаамал хотодо ажаһуудаг байгаабди. Одоол тэндэ хэдэн һараар шахуу бог абаашагдадаггүй һэн. Тэндэ ажаһуудаг нүхэдтэйгөө хөөрэлдэхэдэмнай, энэ талаар асуудал мүнөөшье шиидхэгдээгүй гэлсэнэ һэн.

Зинаида Дашиева, Хурамхаанай аймагай ажаһуугша:

- Хүдөөгөөрхиндэ тиимэ ехэ ямар хог байхаб даа. Дэлгүүр ошоходоо, өөрынгөө оёһон бүд туламаа абаад ошогшоб. Хууха амһарта соогоо хүүгэдтэ һү, жэмэсээ эльгээһээр байтарни, һөөргөө хото руугаа ошодог. Ашаанай томо автомашина ерэжэл байха. «Yшөө юугээ хаяхамнайб?» – гэжэ байжа бэдэржэ байдаг болонхойбди. Тиигээд нэгэ тээ суглуулаад, ондоо газарта хадагалжа байхадань, хог үгы болоно бэшэ ха юм даа. Ёһотойгоор лэ илгажа ба үйлэдбэрилжэ эхилбэлнь, һайн һааб даа.

Эрдэм Доржиев, Хяагтын Наушки тосхондо ажаhуугша:

- Минии эндэ алба хаажа эхилһээр, 1 жэл үлүүтэй саг үнгэрбэ. Сэлэнгын эрье ошожо амарха һанаатай ябаһан аад, голхороод ерээб. Нютагай захаар дүүрэн хог таража хэбтэнэ. Үйлсэ гудамжааршье бага бэшэ. Саг соогоо полигон абаашагданагүй. Энэ нютагай засаг баригшадһаа, тиихэдэ зонһоо тон ехээр дулдыдана. Иигээд Буряад оронойнгоо болон ниислэл Улаан-Үдэ хотынгоо ажаһуугшадаар хөөрэлдөөд байхада, газар бүхэндэ байдал тад ондоо гэжэ харагдана. Һайн һэнэгтэй хүтэлбэрилэгшэтэй коммунальна ажахын эмхинүүд ажалаа жэншэдгүй дүүргэнэ. Харин ажалдаа хайша хэрэг хандажа, гансал ажаһуугшадһаа олзо оршо оложо абахаб гэһэн зорилготой эмхидэ даалгагдаһан газарнуудта хог шорой дүүрэн байна.