Хорото үбшэ тарилга диилэхэ

Майн 11-дэ үнгэргэгдэһэн зүблөөндэ амаралтын үдэрнүүдтэ һэргылэмжын тарилга абаһан зоной тоо тодорхойлогдоо. Эмшэд тарилгануудай хэдэн газар улас дотор эмхидхэжэ, олон хүниие тарихаяа оролдоо. Тиин 93584 хүн түрүүшын тарилга абанхай. 59582 зон хоёр дахин вакцина табюулжа, хорото үбшэнһөө аршалагдаа. Үнгэрһэн хоногой туршада үшөө 2000 гаран ажаһуугшад тарилга абаа.

Мэргэжэлтэдэй тэмдэглэһээр, Ород Уласай олон можо нютагуудта коронавирус үбшэн ехээр һүжэрһэн зандаа. Тиимэһээ харгалзалгын хэмжээнүүд шангалагдажа магад. Һүүлэй үедэ Буряадта СОVID-19 үбшэндэ нэрбэгдэһэн зоной тоо нэгэ бага доошолбошье, эмшэдэй һанаа зобоохо ушарнууд олон. 

Энэ сагта ехэ харюусалгатайгаар бэеынгээ энхэ элүүртэ хандажа, заал һаа вакцинаар тарюулха шухала. Түрэлхидтөө, дүтын нүхэдтөө энээниие ойлгуулжа үгэхэ хэрэгтэй. Али нэгэн тахал үбшэн  һэргылэмжын тарилгын хүсөөр дабагдадаг. Тиимэһээ  олон зоной һэргылэмжын тарилга абахада, бузар үбшэн үгы болохо», - гээд Буряад Уласай санитарна хиналтын ахамад врач Сергей Ханхареев нэгэтэ бэшэ тэмдэглэнэ.

«Спутник V» вакцинын 124284 доза Буряадта асарагдаһан. Мүнөө тэрэнэй  30700 -иинь үлэнхэй.