Эрдэмэй шэнэ гуламта  - Буряад Уласай Хурамхаанда

Хурамхаанай аймагай түб Хурамхаан һууринда һургуулиин шэнэ байшан баригдахань. Аяар 275 һурагшадые багтааха аргатай тус һургуулиин барилгада 434 сая түхэриг гаргашалагдаха. Байгша һарын 6-да «Бурятпроектреставрация» гэһэн барилгын эхмхитэй хэлсээн баталагдаа.

- Һуралсалай хоёрдохи, гурбахи халааниие усадхаха зорилготойгоор бэелүүлэгдэһэн түсэлэй ёһоор тус барилга хэгдэхэ. 3 дабхарһаа, 7 залгалааһаа бүридэһэн 6 мянган дүрбэлжэн метр уужам талмайтай байшан болохо. «Шэнэ үеын һургуули» гэһэн үндэһэн түсэлэй аргаар барилга хэгдэхэ, - гээд, Засагай газарай Толгойлогшын орлогшо Евгений Луковников дуулгаба.

Энэ һургуулиин барилга ерэхэ жэлдэ дүүрэжэ, һуралсалай шэнэ хаһада һурагшад һаруул шэнэ байшан соо эрдэмэй далайе гаталха аргада хүртэхэнь.