577
Буряад ороной байгаалиин онсо харууhатай газар дэбисхэрнүүдтэ нарhан болон хасуури модонуудые тарижа эхилээ. Түймэрhөө хохидоhон ой hэргээхэ талаар Кикинскэ болон Байкальска ойн ажахынууд хамтаржа ажал ябуулна.
Ойн түймэрэй удаа байгаалимнай жэгтэй муухайгаар үзэгдэдэг. Онсо харууhатай дархан газарнуудые гал тойрон гарадаггүй, эдэ газарта ямаршье техникээр хүрьһэ элдүүрилхэнь хорюултай юм. Тиимэhээ байгаалиин онсо газарнуудай дэбисхэртэ гурбан арга боломжоор ойгоо hэргээнэ.
Ой модоёо hэргээхэ талаар холимол арга Буряадта анха түрүүшынхиеэ туршагдаба. Ганса Прибайкалиин дархан газарта бэшэ, харин бүхы ойн 37 ажахынуудта иимэ арга хэрэглэгдээ. Талмайнь тиимэ ехэ бэшэ, оройдоол хахад гектарта таригдаба. Ой модо hэргээхэ ажалай хойноhоо байгаали хамгаалгын прокуратура шангаар хинана. Илангаяа БАМ-ай түмэр замда хэгдэхэ ажалнууд хинагдаха, үшөө тиихэдэ зайн галай баханануудые бариха, утаhануудые татаха хэрэг мүн лэ прокурорнуудай анхаралда байха. Тиимэhээ барилгын эмхинүүд хуули хазагайруулангүй, байгаалияа бузарлангүй бүхы ажалаа ябуулха ёhотой.
Онсо харууһатай газарнуудай ой модо hэргээхэ хэрэг хэдэн арбаад жэлэй туршада хэгдэхэ. Нарhан модон түргэн ургажа, оршон тойронхииемнай шэмглэхэ. Хэhэн ажалайнь үрэ дүн намартаа эли харагдаха болоно.
Автор: Эрдэни РАДНАЕВ
Фото: БГТРК
