​Буряад Уласта сэбэр агаар хэрэгтэй

Улаан-Үдэ, Гусиноозёрск хотонууд болон Селенгинск һуурин “Сэбэр агаар” гэһэн гүрэнэй программада оруулагдаха тухай уридшалһан хэлсээн Санкт-Петербургда үнгэрһэн экономическа суглаанда баталагдаа. Буряадай Толгойлогшо Алексей Цыденов энээн тухай өөрынгөө социальна хуудаһанда толилһон байгаа.

- Ехэ үрэ дүнтэй суглаан үнгэрөө. Буряадай бэрхэшээлтэ болоһон олон асуудалнуудаар хэрэгтэй зоноор уулзаабди, тэрэнэй тоодо “Сэбэр агаар” тухай асуудал болоно. Роспотреб-хиналтатай тусхай меморандум зохёожо, Улаан-Үдэ, Гусиноозёрск хотонуудые болон Селенгинск һууриниие федеральна программада оруулха тухай, - гэжэ Алексей Цыденов бэшэһэн байна.

Үнэхөөрөөшье, муухай агаар Улаан-Үдын зониие ехэтэ хүлгөөнэ. Үбэлэй сагай ерэхэдэ, хотынхид сэбэр агаараар амилхаяа болино гээшэ. Эмшэдэй хэлэһээр, муухай агаарһаа олон тоото үбшэнүүд һүжэржэ эхилдэг. Тэдэнэй тоодо, хабдарай үбшэн.

Буряадай ниислэлдэ 67 мянган модон гэр, 6 мянган юридическэ нюуртай котельни шулуун нүүрһээр болон түлеэгээр гэр байраяа дулаасуулна. Бензапирен гэһэн хорото бодос үнгэрһэн үбэл хэмһээ 30 дахин ехэ байгаа. Юуб гэхэдэ, хотомнай хажуу тээһээ хадануудаар халхалаатай байхадаа, хорото муухай агаар һалхинда үлеэлгэнэгүй, нэгэ газартаа тогтошоод байна ха юм.

Роспотреб-хиналта хоёр хотын болон нэгэ һууринай агаарта хэр ехэ хорото бодосууд хаягданаб гэжэ ходо шалгажа байхаар хараалагдана. Агаараа сэбэр болгохо тухай Буряадай Толгойлогшо Алексей Цыденов үшөө 2020 ондо хэлэһэн байгаа.

“Өөрөө сонхоёо тайладаггүйб”, - гэжэ мэдүүлээ һэн. Байгша оной февраль һарада Улаан-Үдын агаар сэбэр болгохо дүүрэн түсэб Москва хото руу дурадхагдаһан байгаа.

“Сэбэр агаар” гэһэн федеральна программа “Экология” гэһэн үндэһэн түсэлдэ ородог юм. Энэ программада ороһон муу агаартай хотонууд гүрэнһөө ехэхэн мүнгэн туһаламжада хүртэжэ, агаараа сэбэр болгохо ажал ябуулдаг юм. Буряадаймнай агаар сэбэр боложо, арад зомнай айнгүй амилдаг болохо бэзэ гэжэ найдаха дуран хүрэнэ.