​Буряад Уласта һургуули түгэсхэгшэдэй найр наадан болюулагдаба

COVID – 19 үбшэнэй түргөөр таража, арад зоной үбшэлжэ байһанһаа дулдыдажа һургуули дүүргэжэ байһан хүүгэд энэ баярта ушараа тэмдэглэхэ аргагүй болобод. Энээн тухай мүнөөдэр болоһон суглаан дээрэ элирбэ.

- Намарайхида адляар үбшэнтэнэй тоо үдэрһөө үдэртэ олошорно. Эгээл тиимэһээ һургуули түгэсхэгшэдэй найр наадан болюулагдаба. Бэшэ ямаршье аргагүйл даа. Нэгэ ангиин дүхэригтэ һургуули дүүргэһэн тухай үнэмшэлгэнүүдыень барюулха гэһэн шиидхэбэри абтаба, - гэжэ Буряад Уласай Толгойлогшо Алексей Цыденов хэлэбэ.

Нёдондо һуургуули дүүргэһэн залуушуул мүн лэ иимэ байдалда ороо һэмнай даа. Эдирхэн хүүгэдэй энэ наһанайнь түрүүшын хамтын баяр иигэжэ хорюулагдажа байхадань хайратай. Теэд яахабши иимэ сагай орожо ерээд байхадань?