​Хори руу аяншалга

Ивалгын, Яруунын, Сэлэнгын аймагуудай ветерануудһаа бүридэһэн бүлгэм олониитын ажалай эдэбхитэн Долгор Батоцыреновна Максаровагай ударидалга доро һаяхана Хориин аймагай түүхэтэ Анаа дасанаар, Хориин аймагай түбөөр аяншалаад ерээ.

Дасан дээрэ шэрээтэ Лэгсэг ламбагай угтажа, Галдан Шаддублин дасанай һонирхолтой түүхэтэй аянша айлшадаа танилсуулжа, тэдэнэй һайшаалда хүртэбэ.

Аймагай ветерануудай бүлгэмэй түрүүлэгшэ Галина Цырендоржиевна Цыреторова, Хориин аймагай хүндэтэ эрхэтэн, Буряадай соёлой габьяата хүдэлмэрилэгшэ Бато Далаевич Цыдыпов, аймагай ветерануудай дэргэдэхи «Рябинушка» гэжэ дуунай ансамбль сагаан хадагаар, сагаан эдеэгээр хани халуунаар угтан абаа. Һүүлээрнь Хориин хатанай урин гоёор бүтээгдэһэн хүшөөтэй танилсуулба.

Хориин түбтэ бүтээгдэһэн түүхэтэ хори буряадай 11 эсэгын түлөөлэгшэдһөө бүридэһэн делегациин Пётр хаанда ошоһон үйлэдэ зорюулагдаһан хүшөөе харуулжа, һонирхол татама зугаа дэлгээ.

Эдеэ хоолой байшан соо уулзалга үргэлжэлжэ, “Рябинушка” ансамбль гүрэнэй хоёр хэлэн дээрэ дуунуудаа хангюурдажа, айлшадаа ехээр баясуулба.

Хориин түбэй түүхын музей орожо, аймагай һонин түүхэтэй ба социально-экономическа хүгжэлтэтэй танилсаба. Ямар баян музей гээшэб даа. Богонихон саг соо республикын аймагуудай дунда мүнөө үедэ һалбаржа, хүгжэжэ байһан байдалтай танилсаад, аяншалагшад баяр баясхаланаа хүргөөд, нютагаа бусаа.

Эдэниие абаашажа, наһандаа мартахаар бэшээр ябажа ерэһэндээ, булта зүрхэнэй оёорһоо баяраа Долгор Батоцыреновнада мэдүүлээ.

Светлана Дашиева, багшын ажалай ветеран