​Буряадай Толгойлогшо эмшэдтэ баяраа мэдүүлээ

Үнгэрэгшэ амаралтын үдэрнүүдтэ Буряад Уласай Толгойлогшо Алексей Цыденов СОVID-19 үбшэнһөө аргалдаг газарта ошожо, улаан нара хараха забгүй ажаллажа байһан эмшэдтэй болон тэндэ хэбтэһэн зонтой уулзаба. Толгойлогшо тэндэ юун боложо байһыень өөрынгөө хоёр нюдөөр хараад, иигэжэ һанамжална.

- Би иишээ түрүүшынхиеэ ерэбэ гээшэб. Харин үбшэн хүүгэдые түрүүшынхиеэ харабаб. Ехэл хүндэ байна. Хүүгэдэй үбдэхэдэ, ехэшүүлэй зүрхэн яншадаг гээшэ. Арга абажа байһан зон тэндэ ажаллажа байһан эмшэдтэ ехэл баяраа мэдүүлнэ, - гэжэ Алексей Самбуевич газаа гараһаар, олондо мэдээсэл тараадаг эмхинүүдтэ дуулгаһан байна.

 Мүнөөдэрэй байдалаар эмнэлгын газарта сүлөө газаргүй, ехэл олон үбшэнтэн тэндэ хэбтэнэ. Тусхайлбал, түхеэрэгдэһэн 13 эмнэлгын газарта 3081 хүн оронхой, харин гэртээ эмнэлгэ абажа байһан зоной тоо 2721 хүрөө. Энэ үбшэнтэй тэмсэхын түлөө 2,5 мянган эмшэд татуулагдаа.

- Энэ ехэ буянта хэрэг эрхилжэ байһан танда баяраа мэдүүлнэб. Һайн бэлэйт! – гэжэ Алексей Цыденов эмшэдтэ һайниие хүргэһэн байна.