​«Буряадай гүрэнэй шагналнууд тухай» хуулида нэмэлтэ хубилалтанууд оруулагдаба

«Түймэрһөө хамгаалгын Буряад Уласай габьяата хүдэлмэрилэгшэ», «Буряад Уласай габьяата абарагша» гэһэн хүндэтэ нэрэ зэргэнүүд байгуулагдаба. Энэ хуулиин түсэл Арадай Хуралай ээлжээтэ 18-дахи сессидэ нэгэдэхи уншалгаар абтаа.

«Хүн зониие абардаг, аюулнуудые усадхадаг, түймэрнүүдые унтараадаг зондо заал һаа, Буряад уласай гүрэнэй шагналнууд олгуулагдаха ёһотой», - гэжэ Арадай һунгамал Виталий Лыгденов хэлэнэ.

Мүнөө үедэ Буряадай түймэрэй харууһалалгын албанда, Буряадай гүрэнэй түймэртэй тэмсэлгын албанда хоёр мянган мэргэжэлтэд хүдэлдэг юм. Буряадай уласай бэдэрэлгэ-абаралгын албанда, Улаан-Үдэ хотын бэдэрэлгэ-абаралгын албанда, Россин МЧС-эй Байгалай бэдэрэлгэ-абаралгын албанда, мүн Буряадай эмнэлгын катастрофын территориальна түбтэ 150 абарагша хүдэлдэг байна.