​Буряадай 192 мянган үхибүүд һургуулиин эхилхэһээ урид тэдхэмжэдэ хүртэхэ

Ородой Холбоото Уласай Юрэнхылэгшэ Владимир сэхэ дамжуулгын үедэ һургуулиин наһатай үхибүүдтэй бүлэнүүдтэ тэдхэмжэ түлэхэ гурим тухай тодорхойлбо. Август һарада һурагшадта арба-арбан мянган түхэриг түлэгдэхэ гэжэ энээнһээ урид хэлэгдэһэн байгаа.

Тиихэдэ үсэгэлдэр гүрэнэй хүтэлбэрилэгшын хэлэһээр, мүнөө жэл һургуулида орохогүй зургаа наһатай үхибүүдтэй бүлэнүүд тэдхэмжэдэ хүртэхэ.

Энэ тэдхэмжэ нэгэ доро түлэгдэжэ, тэрэниие үхибүү һургуулида суглуулхадаа гаргашалха хэрэгтэй гэжэ Юрэнхылэгшэ тэмдэглээ.

Буряадай Пенсионно жасын уридшалһан тоо баримтаар, уласай 192 мянган үхибүүдтэ туһаламжа үзүүлэгдэхэ. Энэ туһада хүртэхын түлөө Госуслуги гэһэн порталда мэдүүлгэ оруулха хэрэгтэй.