498
Түнхэнэй Үндэһэтэнэй хүреэлэн аяншалгын талаар бүхэроссиин гол шанда хүртэһэн байна. Хажуугаарнь уласхоорондын хэмжээ ябуулгада амжалтатайгаар хабаадажа ерэбэ.
“Туристический бренд: лучшие практики” гэһэн мэргэжэлтэ урилдаанда 2020 оной дүнгүүд согсологдобо гээшэ. “Туристический бренд” гэһэн шэглэлээр олон тоото хабаадагшадай дунда түнхэнэйрхидээ аяншалгын түсэл эрхим гэжэ нэрлэгдээ.
Түнхэнэй хүреэлэн ганса байгаали хамгаалгын уялгануудые дүүргэхэ бэшэ, мүн хари гүрэнүүдэй жэшээгээр аяншалга хүгжөөхэ талаар ажал оройдоол хэдэн жэлэй саана ябуулжа эхилһэн юм.
- “Тункинская долина” гэһэн аяншалгын кластер байгуулха тухай түсэбнай бэелүүлэгдэжэ эхилхэнь. Зүб харгыгаар урагшаа дабшажа ябаһыемнай тус шан гэршэлнэ. Нэн түрүүн тусхай сайт зохёожо, тэндээ һонирхолтой баримтануудые, байгаалиин һайхан үзэгдэлнүүдые, арад зоной түүхэ, ёһо заншалнуудые суглуулаабди. Хүн бүхэн баян сайттай танилсажа, һайн сагай тогтоходо, ерэжэ, өөрын нюдөөр хараха бэзэ гээд найдагдана, - гэжэ хүреэлэнэй захирал Алдар Доржиев хөөрэнэ.
Ород болон Франци гүрэнүүдэй хоорондо байгуулагдаһан “Трианонский диалог” гэһэн талмай дээрэ “Тункинская долина” баһа үндэр сэгнэлтэдэ хүртэһэн байна.
Автор: Борис БАЛДАНОВ бэлдэбэ.
