602
Июлиин 11-дэ Бүхэроссиин шуудан холбооной hайндэртэй дашарамдуулан, Буряадай шуудан холбооной хүдэлмэрилэгшэдтэ онлайн аргаар грамотонуудые барюулагдаба. 71 ажалшад корпоративна шагнал абаа, 6 хүн Хэлхеэ холбооной яаманай дээдэ шанда хүртөө. 20 ажалшадай зурагынь болон нэрэ обогынь Буряадай гүрэнэй шууданай хүтэлбэриин Хүндэлэлэй самбарта толилогдоhон байна.
I дугаар Пётр хаанай зарлигаар Москва Архангельск хоёрой хоорондохи шууданай харгы нээгдэhэнэй 300 жэлэй ойн баярта зоюрулагдажа, 1994 онһоо мэргэжэлэй энэ үдэр тэмдэглэгдэжэ эхилээ. Харин Бүхэроссиин шууданай түүхэ мянга гаран жэлhээ дээшэ намтартай – эхиеэ IX зуун жэлэй hүүлээр абана. XV-XVI зуун жэлнүүдэй хугасаада шууданай станцинууд Россиин бүхы дэбисхэртэ нээгдэhэн байгаа. XIX зуун жэлдэ эгээл түрүүшын шууданай марканууд болон карточканууд бии болоhон. 1894 ондо Росси гүрэн Бүхэдэлхэйн шууданай холбооной 22 эмхидхэн байгуулагшадай нэгэн болоо юм. 2019 оной октябриин 1-hээ эхилжэ, Россиин шуудан шэнэ хүгжэлтын харгыда ороо – «Почта России» хуби ниилүүлһэн бүлгэм гэжэ нэрлэгдээ.
Мүнөө сагта Буряадай шуудан холбоон 291 таhагуудтай, тэдэнэй 77% хүдөө нютагуудаар болон багахан хотонуудаар тараагданхай. Тодорхойлбол, шууданай холбоон манай гүрэнэй бүхы дэбисхэртэ хараалагданхай.
Буряадай шууданай холбоондо энэ сагта 2300-аад ажалшад хүдэлнэ, тэдэнэй тоодо 704 почтальонууд, 271 операторнууд болон 130 жолоошод ороно. Жэл бүри шууданай ажалшад 10 сая үлүүтэй бэшэгүүдые тараана, 0,8 сая хари гүрэнүүдhээ ерэhэн багахан пакедүүдые, 0,7 сая посылкануудые, 335000-hаа дээшэ переводуудые хараадаа абана. Харин үшөө 1,5 сая коммунальна зүйлэй счёдуудые хүргэнэ, уласай арад зон 1,3 саяһаа дээшэ элдэб янзын түлбэри түлэнэ.
Энэ үедэ шууданай таhагууд олон шэглэлтэй, олон асуудалнуудые шиидэжэ болохо юм: бэшэгэй зүйлнүүдые ябуулха, коммунальна түлэбэриеэ түлэхэ, аха дүүнэртээ гү, али ажалайнгаа партнёрнуудта мүнгэн зүйл эльгээхэ, страхованиешье (даадхал) хэжэ, лотерейн биледшье зон абажа шадаха. Багахан хүдөө нютагуудта шууданай таhагууд гансахан гүрэнэй эмхи зургаан, түб байра болоно гэхэдэ, алдуу болохогүй. Арад зон эндэ уулзажа, hониёо хубаалдана, хөөрэлдэнэ.
Хамшагай дэлгэрхэ үедэ шууданай таhагууд онлайн сервисүүдые хараадаа абагты гэжэ хүн зондоо мэдүүлнэ. Компаниин сайт дээрэ гү, али гар утаhанда мобильно хабсаргалтын хүсөөр посылка ябуулха, захигдаhан электронно бэшэгүүдыешье абаха, эльгээхэ арга бии. Тиибэшье сонинуудаа захиха, посылканууд хаана ябанаб гэжэ адаглаха, наhажаал зон гэртээ хэрэгтэй зүйлнүүдые захиха арга олгогдонхой.
«Буряадай таһагай шуудан холбооной хүдэлмэрилэгшэд улам саашаа хүгжэхэ хэрэгтэ ехэхэн ажал ябуулна. Шууданай таhагуудые дэмжэхэ, ажалайнгаа ябадал һайжаруулха, компьютернуудаа шэнэлхэ болон шэнэ программануудые хэрэглэхэ эрхэтэй болонобди. Манай хэдэг ажалнай хадаа бүхы хүдэлмэрилэгшэдэймнай хамтын ажалhаа дулдыдана. Ажалыемнай арад зон сэгнэжэ, хараадаа абаха гэжэ найданаб.
Энэ үдэрэй баяраар шууданайнгаа хүдэлмэрилэгшэдые амаршалха хүсэлтэйб! Бүгэдэ тандаа нэн түрүүн бэеын элүүр энхые, зол жаргал, ажалай, гэр бүлын баяр хүсэнэб! Хэжэ ябаhан ажалтнай урагшатай, hанаа сэдьхэлтнай дүүрэн, буянтай хэшэгтэй ябыт даа бултадаа!
Бэлиг талаангаа, хүсэ шадалаа энэ ажалда зорюулhан хүндэтэ майнай шууданай ветерануудта талархалаа, баяр баясхаланаа мэдүүлнэбди! Аха заханарнай шууданайнгаа эрхим заншалнуудые байгуулhан түүхэтэй! Шууданаа hалбаруулха хэрэгтэ танай оруулhан аша габьяа оршон сагай шууданаархидта гайхамшагта жэшээ болоно», - гэжэ Буряад уласай шууданай холбооной дарга Баир Чимитдоржиевич Ринчинов хэлээ.
Фото: kod.ru
