822
Июлиин 12-һоо Буряад Уласта хорюултанууд хүсэндөө бэшэ болоод, ажабайдал урданайнгаа гуримда оробо.
Үнгэрһэн хоёр долоон хоногто эмхи зургаануудай хүдэлөөшьегүй һаа, хүдөө нютагаархид юрэ миин һуугаагүй. Илангаяа Сэлэнгын аймагта “Бидэ хамтадаа” гэһэн онлайн-челлендж соносхогдожо, хүдөөгэй зон гэр тойронхи ажалаа хэжэ байһан гэрэл зурагуудаа социальна холбоонууд соогуур олоной һонорто ниитэлүүлжэ байгаа. Энэ хэмжээ ябуулга Харганаагай соёлой байшангай дэргэдэхи «Перспектива.ru» ТОСые хүтэлэгшэ Елена Бальжиева эмхидхэһэн байна. Тиихэдээ хамтын хүсөөр хамшаг дабажа гарахабди, урмаа хухарангүйгөөр ажаһууя гэжэ уряалаа.
Сэлэнгээрхинэй эльгээһэн гэрэл зурагууд соо хүдөө нютагта ажабайдал бурьялжа байна гэжэ харахаар: хартаабхань сэсэглэнэ, огородой эдеэн эдеэшэнэ, хони хурьгадай нооһон хайшалагдана. Һайшаалтайнь гэхэдэ, үхибүүд ажал хэжэ һурана. Энэ челлендждэ оролсоһон зон гансашье бусад зонтой танилсаа бэшэ, мүн өөрыгөөшье харуулаа.
Июниин 29-һөө июлиин 11 болотор гэрэл зурагууд эльгээгдээ. Сэлэнгын аймагай Ацула, Харгана, Тохой, Енхор, Усть Урма, Жаргаланта, Новоселенгинск, Ноёхон, Галуута нуур, Бараты болон Гусиноозёрск хотын ажаһуугшад энэ хэмжээ ябуулгада эдэбхитэйгээр хабаадаһан байна. Энэ онлайн хэмжээ тухай гансашье аймагай бэшэ, мүн бүхы Буряад Уласай зон мэдэжэ эхилээ. Гэрэл зурагуудыень һайхашааһан һанамжанууд социальна сүлжээн соо олоор бэшэгдээ.
Хизаарлалтанууд болюулагдабашье, бэеэ гамныт гээд, энэ челлендж эмхидхэгшэд олондо хандаба.
“Буряад үнэн” мэдээсэлэй албан
