411
Байлдаануудта баатарлиг үхэлөөр унаһан нютагаархидтаа зорюулһан хүшөө Хоринск һууринда 2004 ондо табигдаа һэн. Һаяын үдэрнүүдтэ тэрэ анха түрүүшынхиеэ заһабарилагдаба.
Афганистанай дайнда унаһан десантник Батор Санжиевай нэрэмжэтэ үйлсэдэ сэрэгэй комиссариадай хажууда энэ хүшөө табигдаһан байгаа. Жэл бүри февралиин 15-да тэндэ дурасхаалай хэмжээ ябуулгада олон хүн суглардаг заншалтай.
Хүшөө заһабарилгада хабаадалсахаяа ганса Хориин аймагай эдэбхитэд бэшэ, мүн Улаан-Үдэһөө, Хэжэнгэһээ түлөөлэгшэд ерэһэн байна. Хүшөөгэй дэбисхэр нэн түрүүн бог шоройһоо сэбэрлэгдээ. Гурбан үдэр соо хүдэлмэрилэгшэд болон ветеран сэрэгшэд хүшөө шэрдээ, сагаадаа. Хуушан хорёо һэлгээ. Түмэрөөр хэгдэһэн шэнэ хашаа табигдаа.
Энээгээр бүхы ажал дүүрээгүй. Хүшөөгэй дэбисхэр дээрэ сэсэгүүд, модод һуулгагдахаар түсэблэгдөө. Дайшалхы газарнуудта унаһан сэрэгшэдэй нэрэтэй дурасхаалай самбар бэлдэгдэжэ, эндэ тодхогдохо. Мүн хүшөө һүниндөө гэрэлтүүлхээр хараалагдана.
Хориин аймагай захиргаанай сайтһаа
