339
Цыбен Жамцаранодо хүшөө барилгаар эмхидхэлэй хорооной зүблөөн үнгэрһэн байна.
Цыбен Жамцараногой нэрэмжэтэ хизаарай номой сангай директор Дарима Дарижаповагай тэмдэглэһээр, энэ номой сангай хорёо соо хүшөө барилгада Агын тойрогой ажаһуугшадһаа 880 мянган түхэриг ороо. Мүнөөдэрэй байдалаар, хүшөөгэй талмай болон һууринь бэлэн, ханань хэгдэжэ байна. «Лотос» эмхи бюст бүтээгээ. Россиин Федерациин хүндэтэ архитектор Болот Дондоков хүшөөгэй түлэблэл зохёоһон юм.
Хүшөө нээлгэ июлиин эсэстэ түсэблэгдэнхэй. Цыбен Жамцараногой нэрэмжэтэ хизаарай номой сан Үбэр Байгалай хизаарай губернаторай грант шүүжэ, хүшөө бариха болоо һэн. Түлэблэл хадаа Агын Буряадай тойрог тоонтотой, ниитэ болон политическэ ажал ябуулагша, СССР-эй Эрдэмэй Академиин гэшүүн-корреспондент, хэлэ бэшэгэй эрдэмэй доктор Цыбен Жамцараногой дурасхаал түүхэдэ үлөөхэ зорилготойгоор бэелүүлэгдэнэ бшуу. Мүнөө жэл Цыбен Жамцараногой түрэһөөр 140 жэлэй ой тэмдэглэгдэнэ.
Агын Буряадай тойрогой Захиргаанай хүтэлбэрилэгшэ Буянто Батомункуев хүшөөгэй хажуудахи дэбисхэр болбосон түхэлтэй болгохо талаар мүнгэнэй гаргаша тоолохыень даалгаа.
«Толон» сонинһоо
