​Үбһэнэй хаһа

Байгша оной зунай хаhа хура бороотой. Тиимэһээ үбhэ ногоон түргэн ургаа. Мүнөө эдеэшэжэ эхилэнхэй. Иимэ зохид уларилда хүдөөгэй зарим ажахынууд тэжээлэй ургамал хуряажа захалба.

Тарбагатайн аймагай «Куйтунское» ажахы Улас дотор эгээл түрүүн үбhэ тэжээл нөөсэлжэ эхилээ. Энэ ажахы байгша ондо 150 гектар газарта донник тариhан байгаа. Энэ хабар, зунай эхиндэшье хура бороогой саг болзортоо элбэгээр ороходо, тэжээлэй энэ ургамал аргагүй hайнаар гараа. Июль hарын hаял эхилээд байхада, хуряажа абахаар болотороо эдеэшээ.

«Үхэр малда ехэ зохид тэжээл юм. Үбэлэй хүйтэндэ малда хэрэгтэй бүхы витаминтай. Доннигоор адуу малаа эдеэлүүлжэ байхада, түргэн тобир тарган болодог»,- гээд, «Куйтунское» ажахын захиралай орлогшо Виктор Мясников хөөрэнэ. Хэдэн зуугаад үхэр малда тэжээл бэлдэхэ гээшэ тиимэшье бэлэн хэрэг бэшэ. Витаминуудаар эгээл баяжаад байхадань, үрдижэ сабшажа абаха хэрэгтэй. Удаань бороодо норгонгүй хоёр үдэрэй туршада хатаагаад, рулон болгожо суглуулна. Хүдөөгэй таряашад уларилаа шэнжэлэн хаража, саг соонь ажалаа үрдижэ хэхэ гэжэ оролдоно. Донник сабшажа байхын хажуугаар шэниисын полиёо элдүүрилжэ абана. Хорхойтой тэмсэжэ, хоро сасана. Хоротой хамта үтэгжүүлгэшье сасагдана. Илангаяа шэниисэ элдэб үбшэндэ бэлээр дайралдадаг гээд ажахын эзэн хэлэнэ һэн.