Жаргалтай гүт?

Зоболон мэдээгүй хүн жаргал гээшые ойлгохогүй гэлсэдэг. Теэдшье жаргалаа мэдэрхын тулада заабол зобохо хэрэгтэй аал? Жаргал гээшые хүн бүхэн өөрынхёороо ойлгоно. Заримашуул үри хүүгэдтээ ами наһаяа зорюулна, нүгөө зариман засаг түрын түлөө шармайна, бусад зон – эд зөөриёо арьбажуулна... Эгээл тиимэһээ эгээлэй зоной эдлэхэеэ тэгүүлдэг жаргал тухайнь асуубабди.

Владимир Будаев, 72 наһатай:

Эды наһандам хүүгэд лэ мэндэ байбал, һанаа сэдьхэл амгалан байха юм даа. Хорото үбшэнэй дэлгэрһэн сагта һанаа зоборитойшье болодог. Үри бэенэрни нютагһаа холо – Америкэдэ ажамидарна. Хүгшэнтэеэ хамта тэдэнэйнгээл түлөө зальбаран һуудагбди.

Зоригто Аюшеев, 50 наһатай:

Олон жэлэй туршада Буряадһаа гадуур ажаллааб. Россиин хизааргүй үргэн дэбисхэрые Тюменьһээ эхилээд, Чукотка хүрэтэр харааб. Вахтаар ябажа, ажал хэхэдээ, элдэбын зонтой танилсагдана. Залуудаа хүнгэнөөр ажаһуужа, хүгшэрхэ наһандаа хүндэ хэрэггүй болоод һалиржа ябаһан эрэшүүлшье дайралдадаг. Тиигээлгүй һаа, һайн байгаа.

Холо гадуур ажал хэхэдэ, гэр бүлын дэмжэлтэ ехэ хэрэгтэй. Наһанайм нүхэр намаяа хүлеэнгүй ондоо хүнтэй һуудаг болошоо. Теэд яахаб? Ажабайдал үргэлжэлһөөр. Ори ганса басагамни айл бүлэ болонхой. Хоёр амтатайхан зээ басагадтайб. Тэдэмнил һайн байһай гэжэ бододогби. Гэбэшье ходо гансаараа ябахагүй юм бшууб? Һанаандам тааруу нэгэнтэй ниилэжэ, хубиингаа жаргал эдлэхэл байхаб гэжэ найданаб. Хүндэ ехэшье юумэн хэрэгтэй бэшэл даа. Түшэхэ тулгалха инаг гансатай, үри бэетэйл һаа, бэшэ юун хэрэгтэйб? Тэдэнэйнгээ түлөө хадашье урбуулхаар ха юм.

Виктор Доржеев, 32 наһатай:

Жаргалтайл юм бшууб. Светэтэеэ гурбан баатар хүбүүдые үндылгэжэ байнабди. Эхэ эсэгэ элүүр мэндэ, үри хүүгэд садхалан, инаг гансымни шарай гэрэлтэйл һаань, намда бэшэ юуншье хэрэггүй. Гартай хүлтэйл һаа, ажал олдоод лэ байха. Юристын мэргэжэл шудалһанби. Диплом хармаандаа хээд лэ, мэргэжэлээрээ нэгэшье үдэр хүдэлөөгүй хүм.

Барилгын ажалда ябааб. Гэр байрануудые болбосон түхэлтэй болгодогшье һэм. Юу хээгүйбиб даа? Мүнөө риелторээр хүдэлнэб. Хажуугаарнь таксида ябанаб. Нүхэрни субилагша мэргэжэлтэй юм. Баһал ажалда ябадаг. Гурбан хүбүүдээ өөдэнь болгохын тулада, ажалаа хараад лэ ябанабди. Тэдэнииемнай хадам баабай эжы хоёрнай харалсадаг. Миниишье гэртэхинэйдэ үнжэдэг даа.

Туяна Доржиева, 38 наһатай:

- Үетэн басагадһаа хожомдожошье һаа, үри бэетэй болоһондоо жаргалтайб. Үендөө хүрөөгүй хүбүүхэмни ажабайдалыем гансата шэмэглээ. Ажалаа хараад лэ ябаһаар, дүшэ наһандаа дүхэхэ болошоод байгааб. Үндэһэтэнэй 1-дэхи лицей-һургуулида, Улаан-Баатарай Ород-Монголой һургуулида багшалаа хүм. Мүнөө үхибүүтэй болоод, миин һуунагүйб. «Джемма Корея» компаниин түлөөлэгшөөр ажаллажа байнаб. Һара бүриин салинтай болонхойб.

Цырегма Сампилова, 60 наһатай:

Жаргал гэжэ юун гээшэб гэhэн асуудалда хүн бүхэн адлихан харюу үгэдэггүй.  Тамын хүн тамадаа жаргалтай гэжэ урданай  сэсэн үгэ  бии гээшэ даа.  Жаргалые хүн бүхэн ондо ондоогоор ойлгодог, илангаяа наhанайнгаа шата бүхэндэ өөрын ойлгосотой байдаг.  Залуу ябахадаа, инаг дуран жаргал, харюугүй дуран зоболон гэжэ hанаха. Бэеэ хүсөөд ябахадаа, ажаhуудалай амжалтын шанар баhал зарим зоной  жаргал мэтээр  үзэгдэхэ. Гэр бүлэ, үри хүүгэдтэй болохо ехэ жаргал гээшэл ааб даа. Зарим зондо хүбхэгэр мүнгэтэй, баян тарган байдал жаргал гэжэ hанадаг.  Алишье талаараа тэгшэ жаргалтай хүн байдаггүй гэжэ hананаб. Би жаргалтай хүн гүб - мэдэнэгүйб. Минии ажаhуудал энэ эреэн юртэмсэ соо гай ехэ тэмсэл гэжэ hанадагби. Сэнхир хүхэ хүбөөтэй пилагар томо табаг дээрэ хуби заяамни намда бэлэн юумэ үгөөгүй гэжэ шоглон хэлэhүү. Минии Жаргал гэхэдэ, энэ түби дэлхэй дээрэ  мүндэлэн түрэхэдөө, угаа бэрхэ, эбтэй эетэй, урагшаа тэгүүлдэг гэр бүлэдэ түрөөл хаб. Долоон хүүгэдтээ дээдэ мэргэжэл үгэжэ, эрдэмтэй хүн жаргалтай гэжэ  балшар багаhаамнай бидэниие хүмүүжэлээ.  Энэ ажаhуудалдаа ажалдаа дуратай ябаха, сэдьхэлээрээ ажалдаа үнэн зүрхэнһөө хандажа хүдэлхэ тон ехэ жаргал гэжэ hанадагби. Хэжэ ябаhан ажалдаа дуратай байхада, ажаhуудалшье хүнгэн байдаг. Жэжэ божо юумэндэ уйдажа, гажаржа ябадаггүйб. Сэхэ сэбэр хандасатай ябахада, олон нүхэдтэй, дүнгэхэ аха дүүнэртэй, хоёр хушуу хүүгэдөө хүлыень дүрөөдэнь табинхай, хөөрхэн аша зээнэртээ эгээл дуратай эжыхэниинь болоод байhандаа жаргалтайб. Мүнөө болотороо дуратай ажалаа хэжэ, hайн ноёдтой, суг ажалладаг һайхан нүхэдтэйб даа - энэ баhа нэгэ ехэ жаргал гээшэ.