437
Июлиин 9-дэ аймагай захиргаанай актова зал соо гиир үргэлгын тамирай хүбүүд басагадай хоорондохи дэлхэйн мүрысөөндэ хүрэл медаль абаhан Алена Тимофеевае ба тэрэнэй hоригшо Юрий Бухаевые баяр ёhололой оршондо угтаа.
Алёна 2021 оной февраль hарада Омск хотодо үнгэрhэн Россиин мүрысөөндэ илажа гараад, Каунас (Литва) хотодо үнгэргэгдэхэ бүхэдэлхэйн мүрысөөндэ манай гүрэнэй тамирай суглуулагдамал командын бүридэлдэ хабаадаха эрхэтэй болоо. Россиин суглуулагдамал команда Литвада 1-дэхи hуури эзэлээ, энээндэ Алёнын аша габьяа бии.
Боохоной аймагай түүхэдэ иимэ үндэр илалта түрүүшынхиеэ туйлагдаба. Гадна Алёна гиир үргэлгын тамирай бүхэдэлхэйн мүрысөөндэ Эрхүүгэй можые түлөөлhэн түрүүшын тамиршан болоно.
Энэ хэмжээ ябуулгада Боохоной аймагай мэр Эдуард Коняев тамирша басаганда, Татьяна Николаевна Тимофеева эжыдэнь ба hоригшо Юрий Вячеславович Бухаевта амаршалгын үгэнүүдээр хандаа.
«Усть-Ордын үнэн» сонинһо
