«Нэгэдэлэй» хүсөөр

Бүхэдэлхэйн будаадын шажантанай шүтэдэг хамаг Бодисаданарай нигүүлэсхы сэдьхэлэй Арьяа-Баала бурхан (Авалокитешвара) эхэ зургаан зүйл хамаг амитаниие илгаагүй хайрлажа, хаража һахижа, ямаршье үедэ туһалжа байдаг гээшэ. Олон түмэнэй хүсөөр бүтээгдэһэн Арьяа-Баала бурхан юундэ имагтал заха холын Захааминай Санага нютагта заларха болоо юм гэбэл, арад зондоо Заяа хамба гэжэ суурхаһан түрүүшын Хамба лама Дамба-Даржаа Заяев Санага нютагые шэнжэжэ үзэхэдөө, энэл даа – Диваажанай орон гэжэ айладхаһан байдаг. Харин XXIV-дүгээр Бандида Хамба лама Дамба Аюшеев Арьяа-Баала бурханай 41 метр үндэртэй, 28 метр үргэнтэй баримал хүрэг залаха һуурииень заахадаа, Санагын Даша-Пүнсэглинг хиидэй хойто Генин-Чимбо уулын энгэр Улаан-Зураа оношолжо хэлээ юм.

Мүнөө үедэ Ивалгын аймагай Нуур-Сэлеэн нютагта энэ мантан ехэ баримал хүрэг бүтээһэн суута уран зурааша, Санагаһаа угтай Юрий Мандагановай ударидалга доро бүхы зүйлнүүдынь байха һууридаа гаргагдажа, тон наринаар хабсаргагдаха ажал түлэг дундаа ябуулагдана.

Нёдондо жэлэй июлиин 16-да хүрэгэй түрүүшын хуби Нуур-Сэлеэнһээ Санага зорёо бэлэй. Энэ жэлэй июлиин 13-да һүүлшынь хуби Санагадаа асарагдаа. Энэ ажалай гаргашануудые Арадай Хуралай һунгамал Геннадий Доржиев өөр дээрээ даажа абаа. Захааминай ойн ажахы ашаанай томо машинануудаар зөөгөө.

Байгша оной майн 30-һаа Улаан-Зураадаа хүрэгөө табиха ажалнууд Юрий Мандагановай өөрынь ударидалга доро эхилээ. Нэн түрүүн анхан бэлдэгдэһэн һууринь шангадхагдан бүхэлэгдөө. 100 мм үргэнтэй, 3 метр үндэртэй 71 түмэр-бетон соргонуудые «СП-Инвест» нэгэдэлэй (ахамад захирал С.Г.Пашинский) геодезистнүүд, бурильщигууд, экскаваторщигууд табяа.

Энэ ажалай ябуулагдажа байхада, Нуур-Сэлеэнһээ хуби хубинуудаар асарагдаһан хэһэгүүдэйнь жэбэрхэ, үмхирхэ, муудахагүйнь тула тусхай шэрээр шэрдэгдэнэ. Энэ 3 жэл хахад соо бүтээгдэһэн туйлай ехэ хүрэгэй бүхы хэрэгсэлнүүдые бүхыдэнь газаа зосооһоонь шэрдэхын тула Закаменск хотын, Хужар, Ёнгорбой, Санага, Утаата, Далахай нютагуудай олон зон хабаадаа.

Июниин 11-һээ хүрэгэй хубинууд дээшээ гаргагдажа эхилээ. Энэ хэрэгтэ олон эрэшүүлэй хүсэн ехэ хэрэгтэй болоо. Июлиин 9-дэ «СП-Инвест» бүлгэмэй туһаламжаар 28 эрэшүүл хүрэгэй түрүүшын хуби - Бадма лёнхобо сэсэг тогтоогоо.

Арадай хүсэ нэгэдүүлхэ

Арьяа-Баалын туйлай ехэ хүрэг бүтээжэ, Санага нютагта залаха гэһэн шиидхэбэриин гарахада, арад зоноо нэгэдүүлэн, энэ дэмбэрэлтэ ехэ хэрэгтэ эдэбхитэйгээр хабаадуулха һайн дуранай «Нэгэдэл» гэһэн эблэл байгуулагдажа, урма зоригтой, урагшаа һанаатай захааминаархин Солбон Будаевые хүтэлбэрилэгшөөр һунгаад, эмхидхэлэй ажал даалгаа бэлэй. Хадааһанһаа эхилээд, модо шулуумнай хуу сэнтэй ха юм даа. Урашуулаа, ажалшадаа байрлуулха, эдеэлүүлхэшье хэрэгтэ баһал мүнгэн зөөри гаргашалагдана гэжэ булта ойлгонобди. Тиимэһээ бүхы зонойл хабаадалгаар нангин энэ хэрэг ябуулагдана гэжэ арад зондоо олондо мэдээсэл тараадаг хэрэгсэлнүүдээр «Нэгэдэл» дуулгажал байна.

Юун хэгдэнэб, хэнһээ хэды мүнгэн, хони мал оробоб, юундэ гаргашалагданаб гэжэ сүлжээ холбоонуудта үдэр бүри мэдээсэгдэжэл байна: Facebook; Instagram; VK, Viber, Буряадайнгаа телевидени ба радиодо, сонинуудта ниитэлүүлэгдэнэ. Хандалганууд, бэшэгүүд Монгол орон болон Шэнэхээн руу эльгээгдээ. Тэндэ баһал өөһэдын эмхидхэлэй бүлэгүүд байгуулагдажа, ажал эдэбхитэйгээр ябуулагдана. Тиигэжэ дэлхэй дайдын али олон булангуудһаа буян үйлэдэгшэд мүнгэ зөөри дамжуулна.

Жэшээлэн баримталхада, 2020 оной июлиин 1-һээ 2021 оной июниин 16 болотор «Нэгэдэл» жасада 2 сая 366 мянга шахуу түхэриг оруулагдаһан байна. Эндэ тэмдэглэхэдэ, 605 мянган түхэриг - хуулиин байгуулгатай ажахынуудһаа, тушаалта нюурнуудһаа, харин бэшэ диилэнхи ехэ зөөри холын Австрали, Америкэ болон дэлхэйн али олон гүрэн түрэнүүдтэ, холын хойто зүгтэ гү, али Алас Дурнада, түрэл Буряадтаа ажаһуудаг гэр бүлэнүүдһээ, уг удамуудһаа, Санагын һургуули дүүргэһэн хүнүүдһээ, ажалшадһаа суглараа. Мүнгэн туһаламжаяа 89644136824 утаһаар эльгээгээд, Цыпилма Владиславовнатай хөөрэлдэжэ, хэрэгтэй мэдээсэл абажа болоно.

Бүгэдэнэй шүтэхэ нангин шүтээниие бодхоохо хэрэгтэ хубитаяа оруулһан хүн бүхэнэй нэрэ алдар «Арьяа-Баалын алтан дэбтэртэ» аржытар бэшэгдэжэ, эхэ зургаан зүйл хамаг амитанай жаргал эдлэхын буян болохо.