

Баир Ширапов, Ивалгын аймагай Поселиин дунда һургуулиин захирал:
- Шэб шэнэ һургуули руумнай энэ жэл 330- аад үхибүүд ерэнэ. 1-дэхи ангиин аяар арбан класс тоологдоно. Намар болотор 11-дэхи класс суглуулагдахал байха. Багшанар булта хүсэндөө. Поселиин һургуули Улаан-Үдэдэ ойро болоно. Аймагуудһаа зөөжэ ерэһэн айлнууд аргагүй олон гэжэ булта мэдэнэбди. Тиимэһээ манай һургуули һурагшадаар олон. Нэгэ талаар багшанарта ажалынь ехэ болоно. Нүгөө талаар харахада, олон багашуултай байхада, салин нэгэ жаа ехэ болоод үгэнэ. Томо ангинуудта багашуул тиимэ олон бэшэ. Ушарынь гэхэдэ, 9-дэхи ангияа дүүргээд, һурагшад оюутад боложо, дунда мэргэжэлэй һургуулинуудта ошоно. Эхин классуудта бэрхэшээлтэй болохоёо һанагдана - гурбан халаанда һураха баатайбди. Ивалгын аймаг үхибүүдые шэрэхэ унаа үгэнэ. Гурбан автобустой болонхойбди.
Элдэб янзын гэр бүлынхид байна. Посели һууринай харгынуудынь абаха танаггүй. Энэ талаар бага зэргэ бэрхэшээл дайралдана. Энэ жэл нэгэдэмэл шалгалтаяа (ЕГЭ) бултадаа тушаагаа. Һургуулияа түгэсэгшэ 15 һурагшад сооһоо нэгэ басаган алтан медаль абажа шадаа. Мүнөө багшанарнай амаржа байна, мэнэ гэһээр халуун хаһамнай эхилхэнь даа.

Баир Дониров, Улаан-Үдын 29-дэхи гимназиин захирал:
- Үнгэрһэн һуралсалай жэл хүндэшэг байгаа. Халдабарита үбшэн боложо, ехэнхидээ онлайн аргаар һуража гараабди. Тиигэбэшье сен-тябриин 1-дэ һурагшадаа угтан абахаар бэлэн байнабди. Багшанарнай амаржа байна. Багшанараар дуталдал гэжэ үгы. Нэгэдэхи ангида 3 класс абаабди - 30-30 багашуул анги бүхэндэнь тоологдоно. Үхибүүднай нэгэдэмэл шалгалтануудаа һайн тушаагаа - бултадаа һуралсалаа үргэлжэлүүлхэ гэжэ дуулгагдаа.

Булат Шойнжонов, Буряадай Үндэһэтэнэй 1-дэхи лицей-интернадай захирал:
- 2020-2021 оной һуралсалай жэл бэлэн бэшэ байгаа. Онлайн аргаар һураха гээшые үзөөбди. Энэ жэл бүхыдөө 701 үхибүүн дүүргэжэ гараа. 8 һурагша алтан медаль абажа шалгараа.
30-30-аар хубаагаад, бүхыдөө 60 үхибүүдые нэгэдэхи ангида абаабди. Энэ жэл онлайн аргаар һуралсалда дадалга байгаа. Багшанарта, һурагшадта, гэртэхиндэ энэ шэнэлэлтэ хүндөөр үгтөө. Тиигэбэшье яһала бэе бэедээ дадажа, энэ онол аргын оньһыень олоһон байнабди. Теэд очно аргаар һурахаһаа дээрэ юумэн үгы гээшэ. Багшанарта юугээрээ хүндэ байгааб гэхэдэ, урид нэгэ танхим соо һуудаг һаа, мүнөө ангинуудаар ябажа, хэшээлнүүдээ үнгэргэхэ баатай болоо. Һуралсалаа үнгэргэдэг ном дэбтэрээ үргэжэ, иишэ тиишэнь зөөхэнь орёо болоо гээд һанагдана. Үхибүүднай баһал нэгэ класс соо һуужа эсээ.
Манай һургуулида энэ жэлэй һайн юумэн гэхэдэ, хэгдэжэ байһан ажалнай лицейн байгуулагдаһаар 75 жэлэй ойн баярта дашарамдууланхай. Тиигэжэ шэнэ стадион баригдаа, харин спортзал бариха хэрэгтэмнай халдабарита үбшэн һаалта хэбэ. Дахин шэнээр проектын данса хэгдэжэ байна. Үшөө нэгэ һайшаалтай таламнай гэхэдэ, сентябриин 1-дэ һургуулиин дэргэдэ кванториум нээгдэхэнь. Бүхы оборудованидань 21 сая түхэриг һомологдоо. Тэрэнэй хажуугаар хоёрдохи жэлээ үхибүүдэй зунай амаралта болюулагдаад байна. Ушарынь - ковид үбшэн юм. «Туяа» гэһэн амаралтын лагерьтайбди, тэндэ 6-дахи ангиһаа багашуул зундаа амардаг байгаа. Ехэ голхоролтой байна.

Екатерина Дондупова, Баргажанай аймагай Баянголой дунда һургуулиин захирал:
- Мүнөө һаял дутуу дундануудаа шиидхэжэ дүүргэбэбди. Үхибүүдээ зөөдэг хоёр унаатайбди, тэрэнээ заһабарилбабди - шэб шэнэ сахаригуудые абаабди. Һургуулидаа жэл бүри хэгдэдэг заһабарилгын, һайхан бололгын ажалнууд хэгдээ юм ааб даа. Һургуулимнай олон жэлэй саана баригдаһан хадаа хуушаранхай. Шэнэ һургуули бариха гэжэ зугаа хэзээнэй ябадаг, одоол энэ жэлдэ проектын дансанууд бүтэхэ бэзэ гэжэ найданаб. Мэнэ бүтэхэ гэжэ проект зохёодог хүн найдуулаа. Хэрэгтэй дансануудыень бэлдэжэ эльгээгээд байнаб.
Даб дээрээ багшанараар дуталдал үзэгдэнэгүй. Наһанайнгаа амаралтада гараһан багшанараа ажаллыт гэжэ гуйжал байдагби, юуб гэхэдэ, залуушуулые урихадамнай, оройдоо ерэжэ үгэнэгүй. Тэрэнь бэрхэшээлтэ болонхой. Мүнөө ажаллажа байһан багшанарни амаралтада гараа һаань, яахабибди? Энэ жэл 19 багашуулые нэгэдэхи ангида угтан абахабди. Харин 11-дэхиеэ зургаан үхибүүд түгэсэжэ гараа. Тэдэнэй хоёрынь алтан медальтай. Ехэ урагшаа һанаатай хүбүүд - бултадаа саашаа һурахаяа ошоо.
Зунай амаралтын хаһа һая эхилһэн аад лэ, болюулагдаа. Багашуулдаа эдеэень хубаажа үгөөбди. Юрэдөө, халдабарита үбшэнһөө бэшэ хуу барагтай.
Автор: Эрдэни РАДНАЕВ