​Буряад Уласта хүдөө ажахын талаар тоо бүридхэл ябуулагдана

Августын 1-һээ Буряад Уласта хүдөө ажахын талаар тоо бүридхэл боложо байна. Мэргэжэлтэд хүн зонһоо малай тоо болон таригдаһан ургамал тухай мэдээсэл бүридхэнэ. Юуб гэхэдэ, сугларһан мэдүүлгэ хараад, тоо бүридхэлэй албанай ажалшад болон нойодууд эгээл шухалатай талануудта хүсэниие оруулха аргатай болохо.

5 жэлэй нэгэ удаа хүдөө ажахын талаар тоо бүридхэлгэ үнгэргэгдэдэг. Мэргэжэлтэд хүн зонһоо ганса малай тоо шалгадаггүй, мүн лэ таригдаһан ургаса тухай һурадаг юм. Бүхы мэдээнүүд нюусаар бүридхэгдэхэ. Тиимэһээ, ажаһуугшад тоо бүридхэлэй албанай ажалшадай асуудалнуудта ехэ оролдостойгоор харюусалдаг.

Тоо бүридхэлэй ажал үнгэргэхын тула 277 бэшээшэд болон 46 инструкторнууд хүдөө нютагуудаар ябажа, хүн зонтой хөөрэлдэжэ, хэрэгтэй мэдээсэл абана. Тэрэ мэдүүлгэнүүдээ планшедууд руугаа бэшээд абана. Улаан-Yдэ хотодо болон 10-һаа үсөөн гэрнүүдтэй һууринуудта хэмжээ ябуулга болохогүй.

«Хүдөө эмхинүүд, таряашан, фермерэй ажахынууд, саад, огород ургуулдаг олзын хэрэг эрхилэгшэд, эрхэтэдэй хубиин хамабариин ажахынууд тоо бүридхэлдэ ороно. Манай Уласта бүхыдөө 132 мянга гаран объектнууд тоологдоно», - гэжэ тоо бүридхэлэй албанай мэргэжэлтэн Дулма Амоголонова хэлэбэ.

Августын 30-да хүдөө ажахын талаар тоо бүридхэл дүүрэхэ. Үнгэрһэн ажалай дүнгүүдые согсолоод, мэргэжэлтэд болон ноёд эгээл шухала талануудта анхаралаа хандуулжа, хүдөө ажахын хүгжэлтэдэ шэнэ хүсэ  оруулха аргатай болохо.