466
Ой хамгаалдаг түбэй мэргэжэлтэд модонуудай шанар хинажа эхилбэ. Энэ ажалай хүсөөр сибириин шелкопряд шумуулай байрладаг газарнуудые элирүүлхэ зорилго табигдана. Зунай хаhада 600 гектар хадата болон тайгата талмай шэнжэлэгдэнхэй. Тиигэжэ намартаа хорото шумуулнуудые усадхахын тула агаарhаа тусхай бодос сасагдаха юм.
Хорото шумуулнуудай байдал элирүүлхын тула мэргэжэлтэд тусхай занга хэрэглэдэг юм. Тэрэ зангань хэрэгтэй шумуулай үнэртэй байдаг.
«Тиигэжэ мүнөө сибириин шелкопряд элирүүлхэ гэжэ энэ шумуулай үнэртэй хэрэгсэл модон соо табигдана. Хорото энэ шумуул хуша болон набшаhата модо хорлоно», - гэжэ Буряадай ой хамгаалдаг түбэй мэргэжэлтэн, биологиин эрдэмэй кандидат Александр Воинков хөөрэбэ.
Захааминай болон Зэдын аймагуудай ой соо шумуул ехээр дэлгэрэнхэй юм гэжэ эрдэмтэн нэмэнэ hэн. Хорото шумуулhаа ой модо хамгаалха зорилготойгоор мэргэжэлтэд үдэр бүри хэдэн модоной зай гаталжа, тусхай бодосуудые газараар табина. Һүүлээрнь тэрэл газараараа ябажа, зангаяа шэнжэлжэ, хорото шумуулнуудай байрладаг карта зохёоно. Тиигэжэ шэнжэлгын дүнгүүдээр садхалгын газарнууд тодорхойлогдоно гэжэ Буряадай ой хамгаалгын түбэй таhагай дарга Иван Марченко хэлэбэ.
Эгээл иимэрхүү шэнжэлгэдэ Яхадай ой модонууд абтаа. Тэндэ ехэ ойн түймэр hүжэржэ байгаашье hаань, ойн хамгаалагшад ажалаа ябуулжа шадаа гэжэ тэмдэглэхэ шухала. Газарай шэнжэлгэ дүүрэнхэй гэжэ Буряадай ой хамгаалгын түбэй захирал Дмитрий Гаев хөөрэнэ. Шэнжэлгын 70 % ушарта сибириин шелкопрядай ажамидардаг талмайнууд тодорхойлогдоо гэжэ тэрэ нэмэбэ. Августын эсэс багаар Буряадай мэргэжэлтэд гэртээ бусаха ёhотой. Удаань карта зохёогдожо авиациин хүсөөр хорото шумуул усадхаха тусхай бодос агаарhаа сасагдаха юм.
Фото: nature.baikal.ru
