Буряадай Ахын аймагай Өөрлиг һууринда шэнэ һургуули баригдажа эхилбэ

Буряад Уласай Ахын аймагай Өөрлигэй һургуули наяад жэлэй саана баригдаһан юм. Мүнөө энэ һургуулида 500-һаа дээшэ һурагшад хоёр халаанда һурана. Тиимэһээ шэнэ һургуули тон хэрэгтэй болонхой. «Болбосорол» гэһэн үндэһэн түсэлөөр баригдаха һургуули 2022 оной намар ашаглалгада тушаагдаха юм.

Мүнөө барилгын ажал эхилээ. Барилгын эмхи талмай бэлдэжэ, фундамент хээ. Тиихэдэ уһаар, дулаагаар хангаха талаар газаахи ажал хэгдээ. Саашадаа табан блогһоо бүридэһэн, гурбан дабхартай байшан эндэ бодохо.

«Өөрлигэй дунда һургуулида 500-һаа дээшэ үхибүүд хоёр халаанда һурана. «Архитектурная студия» гэһэн эмхиин түсэлөөр гурбан дабхартай байшанда 360 һурагшад һураха аргатай. Барилгын ажалда «Болбосорол» гэһэн үндэһэн түсэлөөр 460 сая тухай түхэриг һомологдоо», - гэжэ Буряад Уласай барилгын болон гэр байрын ажахы шэнэдхэлгын сайд Николай Рузавин хэлэбэ.

Байгша ондо Буряад Уласта Болбосорол» гэһэн үндэһэн түсэлэй «Мүнөө үеын һургуули» гэһэн федеральна түсэлөөр 2510 һууритай 6 һургуули баригдана.