​Буряадай Толгойлогшо: «Бэеэ хамгаалха нэгэл арга - энэ вакцина»

Августын 16-да «Тивиком» теле-субагта Буряадай Толгойлогшотой хөөрэлдөөн сэхэ дамжуулагдаа. Алексей Цыденов республикын ажаһуугшадай эгээл шухала асуудалнуудта харюусахадаа, болбосон түхэлтэй болголгын хэмжээ ябуулганууд, Байгалай уһа хамгаалга, уһа голнуудай үерлэлгын байдал болон намартаа үбшэ хабшанай дэлгэрэлгэдэ эсэргүү хэмжээ ябуулганууд тухай хэлээ.

Эгээл гол шухала асуудал - коронавирусна инфекциин дэлгэрэлгые угтуулан бэлдэлгэ болоно.

 - Мүнөөдэрэй байдалаар, байдал яһала тогтууритай. Мүнөө 550 үбшэнтэд больницада эмнүүлнэ. Үбшэнэй эгээл ехээр дэлгэрхэ зунай эхинэй үедэ 3200 хүн һэн. Иихэдээ элүүрые хамгаалгын хүндэ ашаан 6 дахин бага болоо гээшэ. Тиигэбэшье би һанаагаа ехээр бү амарагты гэхэ байнаб. Юундэб гэхэдэ, һургуулинуудай ажал эхилээдүй, хүүгэдэй сэсэрлигүүдтэ булта ябанагүй. Иихэдээ жама ёһоороо хүнүүд обооролдоногүй. Сентябриин 1-эй ерэхэдэл, нэгэдэхеэр, амаралтаһаа булта ажалдаа гараха, үхибүүд һургуулидаа ба сэсэрлигүүдтээ ябаха. Олоной ябадаг транспорт шахатараа дүүрэхэ. Иигээдшье, тиигээдшье хүн зоной дундахи харилсаан ехэдэхэ. Ушар иимэһээл, үбшэн дэлгэрхэ. Тиихэдэл үбшэн хэр зэргээр дэлгэрхэб, маанадһаал дулдыдаха, - гэжэ Алексей Цыденов тэмдэглээ.

Мүнөө Засагай газаршье, эмнэлгын эмхинүүдшье вакцинациин ябасые шамдуулха арга хэмжээнүүдые абана гэжэ тэрэ онсолоо.

- Бэеэ хамгаалха нэгэл арга - энэ вакцина, али “противочумна костюм” үмдөөд, гэртээ һууха. Өөрынгөө ажабайдал хизаарлажа, хододоол хаалгаатай һуухагүйш – юрынгөө байдалаар ажаһуухаяа вакцина табюулхал даа. Бидэ гриппһээ һэргылэмжын тарилга хүүлэнэ ха юмбибди. Энэшье тарилга баһал юрын хэмжээн болохо ёһотой. Ондоо арга манда үгы. Харин мүнөө вакцинациин ябаса шаналмаар унаа. Үбшэнэй ехээр һүжэрхэдэ, булта һанаагаа зобожо, һэргылэмжын тарилга табюулхаяа яараа һэн. Харин мүнөө үсөөршэбэ. Манда вакцинашье, нөөсэшье элбэг ха юм. Коллективнэ иммунитедтэй болохын (бултаниие хамгаалхын) тула, үшөө 160-аад мянган хүнүүд тарилга абаха ёһотой, - гэжэ Буряадай Толгойлогшо хэлээ.

Алексей Цыденов мүн баһа хизаарлалгын хэмжээнүүдые һуларуулха түсэбүүдтэй танилсуулаа.

- Бидэ шата шатаарнь хизаарлалгануудые һуларуулнабди, тэдэ яһала үсөөрөө. Энэ мягмар гарагта фудкортнуудай асуудал штабта хэлсэхэбди. Эпидемиологическа албантай хамта тэдэнэй ажал эрхилэлгые тааралдуулхабди. Бидэ, энэшье ойлгосотой, дүрбэдэхи долгиной ерэлгэдэ бэлдэнэбди: кислородоор, эм домой нөөсэ байгуулнабди. Тиигэбэшье, иимэ ушар бү болоһой гэжэ һанагдана. Бидэ гурбадахи долгиндо гүйсэд бэлэмди гэжэ һанаа һэмди. Генералнууд ходо үнгэрһэн дайнда бэлдэдэг – тиихэдэ бидэ хоёрдохи долгиной дүнгүүдээр бэлдээбди. Теэд халдабариин, наһа баралгын, хүндөөр үбшэлэлгын, кислород хэрэглэлгын талануудаар энэ гурбадахи долгин тад ондоогоор ерээ. Хүндэтэ нютагаархид, манда ондоо арга үгы – гансал вакцинаци, - гэжэ Алексей Цыденов тобшолол хээ.