​Түшэгэнэнэ зүрхэн - түрүүшын анги руу

Мүнөөдэр сентябриин нэгэн. Росси дотор эрдэм һуралсалай үдэр гээшэ. Энэ үдэр хэдэн мянгаад 6-7 наһанай багашуул болбо[1]соролой үргэн харгыда гараба. Буряад Уластамнай 2021-2022 онуудай һуралсалай жэлнүүдтэ түрүүшын ангида 16 852 багашуул эгээл түрүүшынхиеэ һургуулиин богоһо алхажа оробол даа. Харин 11-дэхи класста - 6307, 9-дэхи класста - 13 049 һурагшад орохо. Мүнөө жэл һургуулияа түгэсхэхэ үхибүүд хабарай сагта Гүрэнэй нэгэдэмэл шалгалтада бүхэли жэлээ бэлдэжэ гараха.

Һүүлэй хэдэн жэлэй туршада Буряадтамнай холо ойрын нютагуудаар һургуулинууд баригдаад нээгдэнэ. Хуушарһан байшангууд һэльбэн шэнэлэгдэнэ. Халдабарита ковид үбшэнэй үедэ багшанар, багашуул онлайн аргаар хэшээлнүүдээ үнгэргэдэг байгаа. Шэнэ технологи шудалха хэрэгтэ үхибүүдшье, багшанаршье һураа.

Булат Шойнжонов, Буряадай Үндэһэтэнэй 1-дэхи лицей-интернадай захирал: “1-дэхи класста мүнөө жэл 60 үхибүүдые абаабди. 30-30- аар хубаагаад, хоёр класс болгожо бүридхөөбди. Үнгэрһэн һуралсалай жэлдэ коронавирус үбшэнһөө боложо, онлайн аргаар хэшээлнүүд ябуулагдаа һэн. Багшанарта, һурагшадта, гэртэхиндэ ехэ хүндэ байгаа. Тиигэбэшье яһала дадажа, энэ онол аргын оньһыень олоһон байна. Теэд очно аргаар һурахаһаа дээрэ юумэн үгы гээшэ. Манай һургуулида энэ жэлэй һайн юумэн гэхэдэ, хэгдэжэ байһан ажалнай лицейн байгуулагдаһаар 75 жэлэй ойн баярта дашарамдуулагдана. Шэнэ стадионтой болообди, шэнэ спортзал бариха хэрэгтэмнай халдабарита үбшэн һаалта хэбэ. Дахин шэнээр проектын данса хэгдэжэ байна. Үшөө нэгэ һайшаалтай таламнай гэхэдэ, һургуули дээрэ үндэһэлэн, кванториум нээгдэхэнь. Бүхыдөө энэ хэрэгтэ 21 сая түхэриг һомологдоо. Һуралсалай үедэ бүхы санитарна баримтанууд сахигдаха, үнгэрһэн һуралсалай жэлэй гуримаар ажаллахабди”, – гэжэ хэлэнэ һэн.

Жэлэй дүүрэтэр үшөө гурбан шэнэ һургуули үүдээ сэлихэ ёһотой. Ковид үбшэнһөө һэргылэмжын бүхы гуримууд шанга сахигдаха. Үглөө бүри багашуулай бэеын халуун хэмжэгдэхэ, һургуулинуудта үдэрэй оло дахин шиигтэй сэбэрлэлгэ хэгдэхэ.