​Ород Уласта мүнөөдэрһөө хүсэндөө ороһон хуулинууд

Мүнөөдэрһөө эхилжэ, Ород Уласта хэдэн шэнэ хуулинууд хүсэндөө оробо. Тэдэнэй нэгэ хэдыень дурдахада, иимэ байна.

Тэдхэмжэ

2021 оной сентябриин 1-һээ хүүгэдэйнгээ үбшэлхэдэ, тэдэнэйнгээ хойноһоо харууһалһанайнь түлөө гэртэхиндэнь дунда зэргын салингайнь 100% түлэгдэхэ болоно. Тиихэдээ нэгэшье жэл хүдэлһэн гү, али арбаад гаран жэл ажаллаһан мэргэжэлтэн гэжэ илгаа байхагүй. Энэ хуули гансал 8 наһа хүрэтэр хүүгэдтэй гэртэхиндэ хараалагдана.

Залуушуулда

Соёл урлалтай дүтэ танилсаха арга залуушуулда олдобо. 14 наһанһаа 22 наhа хүрэтэр залуу һүрэг «Пушкинска карта» нээхэ болобо. Тэрэ карта дээрэнь 3000 түхэриг гүрэнэй талаһаа үгтэхэ. Тэрэ мүнгэнэй аргаар хүүгэд Ород Уласай 800 гаран соёлой һалбариин эмхинүүдтэ орожо, уран һайхантай танилсаха аргатай болоно. Ерэхэ жэлдэ иимэ туһаламжын хэмжээн дээшэлүүлэгдэжэ магад.

Жолоошодой яла

Тусхай видеокамерын аргаар харгын дүрим эбдэһэниие баримталһан тогтоолые буруу гэжэ һанабал, госуслуги сайт дээрэ орожо, мэдүүлгэ бариха аргатайт. Тэрэниие дахин сүүдтэ анхаралтайгаар хаража, зүб, буруу байһанииетнай элирүүлхэ. Мүнөөдэр энэ шэнэлэлгэ үшөө һайнаар шэнжэлэгдэжэ, зохёогдожо байна.

Халуун эдеэн

Эхин ангиин һурагшад бултадаа халуун эдеэгээр хангагдаха болобо. Иимэ хуули 2020 ондо нэбтэрүүлэгдэбэшье, бүхы һургуулинуудта халуун эдеэгээр һурагшад хангагдаагүй байгаа. Энэ хуули бэелүүлхын тула олонхи һургуулинуудай эдеэ хоол баридаг газарнуудые һэльбэн шэнэлээ, зарим газарта шэнээр бодхоогоо. Энэ хуулиин ёһоор бүхыдөө 7 сая хүүгэд халуун эдеэгээр хангагдаха болоно.

Эдеэнэй шанар шэнжыень гэртэхин шалгажа байха аргатай болоно. Хэрбэеэ дутуу дундануудые элирүүлбэл, «Госуслуги» сайт дээрэ гомдол барижа болохо.