​Буряадай Үндэһэтэнэй 1-дэхи лицей-интернадта түрүүшын хонхо зэдэлээ

Хонхын абяан жэнгиржэ, һуралсалай шэнэ жэл эхилбэ. Зунай хаһадаа багашуул ехэ һайнаар амаржа, булта урганхайнууд, томожоһон байна һэн.

Буряадай Үндэһэтэнэй нэгэдэхи лицей-интернадта Россиин һургуулинуудтал адли хонхо жэнгирээ юм ааб даа. Буряадай Толгойлогшо Алексей Цыденов, Гүрэнэй Дүүмын депутат Алдар Дамдинов энэ лицей ерэжэ 1-дэхи, 9-дэхи, 11-дэхи ангиин һурагшадые ба багшанарые амаршалаа. Алексей Цыденов һурагшадые, багшанарые, гэртэхиниие халуунаар амаршалжа, тэсэбэри, элүүр энхэ ябахыень үреэгээ.

Ковид үбшэнэй дэлгэрхэһээ һэргылжэ, Роспотреб- хиналта Улас доторой һургуулинуудай түрүүшын хонхын һайндэртэ бултыень оруулаагүй гэжэ мэдэнэбди. Олон үхибүүд энэ талаар гомдолтой ябана һэн даа. 

60 үхибүүн 1-дэхи ангида орожо, лицеист гэһэн нэрэ зэргэеэ дээрэ үргэн ябаха гээшые үшөө ойлгоогүй байжа магад. Харин 2-дохи ангиһаа 11-дэхи ангиин һурагшад энээниие һайнаар ойлгожо абанхайнууд. Тэдэнэр наһан соогоо 1-дэхи лицейдэ һураһанаараа омогорхожо ябаха.

Байгша ондо үндэhэтэнэй нэгэдэхи лицей-интернат 75 жэлэйнгээ ойе тэмдэглэнэ. Энэ ушараар олон хэмжээ ябуулганууд түсэблэгдэнхэй. Гансал энэ ковид үбшэн дахин бүри эршэтэйгээр дэлгэрһэй даа.

Тус һуралсалай гуламтын захирал Булат Шойнжоновой хэлэһээр:

“Олон түсэбүүдтэй байнабди. Нёдондо жэл үхибүүдэй бэеэ һорихо тамирай талмай баригдаа. Тиихэдэ шэб шэнэхэн тамирай байшан бариха гэжэ түсэблэнхэйбди. Саарһа гуурһанай дансанууд бэлдэгдэжэ байна. Үшөө нэгэ хэрэгтэй юумэн гэхэдэ, манай һургуулида кванториум хэгдэхэнь. Энэмнай олон һалбаринуудаар үхибүүдые хүгжөөх эаргатай. Октябрь һарада гуламтынгаа 75 жэлэй ойн баяр тэмдэглэхэбди, тиихэдээ кванториум нээгдэхэ гэжэ хэлсээтэй”.

11-дэхи ангиин һурагшадта энэ нэгэ талаараа баяртай, нүгөө талаараа голхоролтой. Арба гаран жэл соо һураһан түрэл болоһон һургуулияа түгэсэжэ, багшанартаа баяртай гэжэ хэлэхэ сагынь ойртоно.

“Энэ жэл ехэ харюусалгатай, нэгэдэмэл шалгалта тушаажа, наһанайнгаа үргэн харгыда гарахабди. Бүхы багшанарта һайниие хүргэхэ байнаб. Манай багшанар, хүмүүжүүлэгшэд  эгээн бэрхэнүүд”, - гэжэ 11-дэхи ангиин һурагша Уянга Раднаева хэлэнэ һэн.

Түрэл хэлэеэ, ёһо заншалаа дээрэ үргэхэ, би Буряадби гээшые багашуулда дүүрэн ойлгуулха гэжэ багшанар, хүмүүжүүлэгшэд оролдодог. Энэ һургуули түгэсэһэн багашуулай олонхинь булта нютаг орондоо  туһатай зон боложо ургадаг.