Үбһэеэ хуряажа эхилээд...

Баир Раянов:

- Үбһэн һайн ургаа. Урда жэлнүүдтэ орходоо, холо дээрэ ааб даа. Августын хорёодоор хуряажа эхилээбди. Мүнөө дээрээ 24 тонно бэлдээд байнабди. Хэрбэеэ урда жэлнүүдтэ 80 тонно үбһэ хуряадаг һаа, байгша ондо 100 тонно абахаар түсэблэнэб. Зелёонхо таринабди. Гадна һолоомо оруулхаб. Ажал хэхэ зомнай үсөөн лэ даа. Энэ ехэ бэрхэшээл. Гадна тоһо түлишын сэн жэл бүри нэмэгдэнэ.

Дадагма Дамбиева:

- Үбһэ тэжээлээ хуряажа эхилээд, ехэ сүлөөгүй болонхойбди. Манай мал бүтэн жэлэй туршада бэлшээд ябадаг. Тиимэһээ малдаа тэжээл тон багаар сабшанабди. Бүхыдөө 500-гаад центнер үбһэ бэлдэнэбди. Залуу малдамнайл үбһэн хэрэгтэй болодог. Бодо малнай бэлшээд ондо ородог һэн тула, үбһэн балай хэрэггүй. Хонид бэлшээд ябаха ёһотой – бэеэ халаана ха юм. Хажуудахи нютагтамнай бэлшээриин газар хомор тула малниинь хорёо соогоо хаалтатай ондо ородог. Хабартаа хоро хоршогор болонхой ябадаг.

 Зоригто Цырендондопов:

- Августын дундуур үбһэеэ хуряажа эхилээбди. Ехые сабшадаггүйбди. Газаахи адуундаал бэлдэнэбди. Гол түлэб хонидые үсхэбэрилнэбди. Үбһэ прессовалхамнай үнэтэй болоно. Гүрэн субсиди үгэдэг лэ даа. Тиигэбэшье урид өөрынгөө мүнгөөр түхеэрэлгэ абанабди. Тиигээд гаргашымнай хахад мүнгыень гүрэн бусааха гэжэ хүлеэнэбди. Энэ тон буруу гэжэ һананаб. Илангаяа Монгол орондо гүрэнһөө туһаламжа тад ондоогоор үзүүлэгдэдэг. Табин хуби мүнгыень шууд эльгээхэдэнь, хүдөөгөөрхин нүгөө хахадыень нэмээд лэ, абаха гэһэн техникэеэ абаадхидаг. Манай эндэ тиигэдэг һаань, ямар бэлэн болоод үгэхэ һэн бэ? Шууд гаргаад үгэхэ мүнгэн хүдөөгөөрхиндэ хаанаһаа байха һэм даа.

Жаргал Дугаров:

- Һаянайл үбһэндөө орообди. Үнгэрһэн зун хура бороотой байжа, ногоон һайн ургаа – хаанашье сабшахада болоно. Галтайн дэргэдэхи Обоогой Бооридо 10-аад гектар газартайбди. Тоормодошье хэдэн гектар газартайбди. Саһанай оротор, сабшажал мэдээ гүбди даа.

Буддын шажанай заншалта Сангхын тараадаг ниигэһэмэй һүрэг хонитойбди. Тэрэмнай нилээд һайн ондо ороод, түл олые үгөө. Хонидоо худалдаад, олоһон мүнгэеэ Түгнэ-Галтайн дасанда хандиб болгон оруулха һанаатай байнабди. 8 субарга бодхоохоёо байна ха юм.