409
Бүхэроссиин үхибүүдэй “Орлёнок” түбэй “Комсомольский” лагерьта 10-дахи халаан сентябриин 7-до үүдэеэ сэлибэ. Ерээдүйдэ гадаадын харилсаа байгуулха талаар ажал ябуулха үхибүүд энэ халаанда сугларна. Буряадай эдир сэдхүүлшэдэй эблэлэй 6 түлөөлэгшэ Людмила Доржиева түрүүтэй үсэгэлдэр агаарай онгосоор Хара далай руу зүг бариба.
Буряадай эдир сэдхүүлшэдэй эблэл гушаад жэлэй туршада зохёохы шадабаритай, эдэбхи ехэтэй үхибүүдтэ “дали жэгүүр” ургуулан, саашанхи мүрыень олгуулна гэхэдэ болоно. Людмила Будажаповнагай хүсэ оролдолгоор бэлигтэй хүбүүд, басагад гансашье Буряадай бэшэ, мүн бүхэроссиин болон уласхоорондын хэмжээнэй урилдаануудта бэеэ мэдүүлнэ.
Үхибүүдэй олониитын нэгэдэлнүүдэй уласхоорондын холбоон угаа һонирхолтой программа бэлдээ. Екатерина болон Ирина Поповууд, Арина Цыбикжапова, Адиса Цындымеева, Кирилл Фёдоров болон Намсарай Эрдынеев гэгшэд эдир дипломадуудай энэ уулзалгада оролсохын тулада бүхэли зунай туршада һуралсал гараа, «Бурятия молодая» сониной шэнэ дугаар хэблүүлээ, видео-буулгабари бэлдээ.
Людмила Доржиевагай дуулгаһаар, хорин үдэрэй туршада тэдэн зохёохы шадабарияа харуулха, олонтой эб нэгэн хүдэлхэ, хани барисаанай шэглэлтэй янза бүриин проектнүүдтэ, мастер-классуудта, акцинуудта оролсохо юм. Гадна буряад арадайшье ёһо заншалтай танилсуулха хүсэлтэй.
Гансашье Ородой Холбоото Уласай бүхы можо нютагуудай олониитын эмхинүүдые түлөөлэгшэд “Комсомольский” лагерьта уулзаха бэшэ, мүн хари гүрэнүүдэйшье үхибүүд онлайн аргаар холбоо бариха гээд хүлеэгдэнэ. Хани барисаа-най хүсэн ехэ – хуби заяашье эрид хубилгажархиха аргатай. Лагерьта байгуулһан нүхэсэл үхибүүдэй хүгжэлтэдэ нүлөөлхэл аабза.
Фото: Елена Цындымеева
