​Усть-Ордын Буряадай тойрогто һэеы гэр гимназида бэлэглээ

Эрхүү можын амбан захирагшын орлогшо, Усть-Ордын тойрогой захиргаанай хүтэлбэрилэгшэ Анатолий Прокопьев һуралсалай шэнэ жэлтэй дашарамдуулан, Усть-Ордын гимнази-интернадта сэнтэй бэлэгүүдтэй айлшалба. Тойрогой захиргаанай зүгһөө һэеы гэр, «Сагаан гол» кооперативай түрүүлэгшэ, гимназиин попечительскэ зүблөөнэй гэшүүн Николай Ефремовэй зүгһөө УАЗ түхэлэй шэнэхэн авто-унаагай түлхюур гимназиин захиралда барюулагдаба.

Һэеы гэр гимназиин хорёо соо һуурияа эзэлээ. Нютаг ороноо шэнжэлэлгын хэшээлнүүдые үнгэргэхэ класс һаяын сагуудта эндэ нээгдэхэ юм. Мүн һурагшад буряад арадай ёһо заншалтай эндэл танилсаха. Һэеы гэрэй тэг дунда гуламта, газаань сэргэ байха. Харин авто-унаа һургуулиин хэрэг бүтээхэдэ, тон хэрэгтэй. Мүнөө жэл гимназида 330 үхибүүн һурана, тэдэнэй 42-ынь - 1-дэхи класста, 20 һурагшад һуралсалаа түгэсхэхэ.