597
Буряадай Тоололгын танхимай байгуулагдаһаар 25 жэлэй ойдо зорюулагдаһан баяр ёһололой хэмжээ ябуулга үнгэрбэ.
Буряадай Арадай Хуралай Түрүүлэгшын орлогшо Цырен-Даши Доржиев амаршалгын үгэ хэлэхэдээ, энэ эмхи зургаанай ажалай үүргэ тон ехэ гээд тэмдэглэһэн байна.
- Федеральна болон уласай һангай мүнгэн хэр зэргэ аша үрэтэйгөөр хэрэглэгдэнэб гэжэ Тоололгын танхим шалгажа байдаг гээшэ. Шүүмжэлгын талаар ехэ ажал ябуулагдана. 25 жэлэй туршада хүдэлжэ байхадаа, гүрэнэй талаһаа мүнгэнэй хиналта, шалгалта ябуулагдажа, аудитор мэргэжэлтэд ажалдаа тон харюусалгатайгаар хандажа хүдэлнэ, - гэжэ Цырен-Даши Доржиев тэмдэглэбэ.
Тоололгын танхимай байгуулагдахада, түрүүлэгшээрнь Геннадий Айдаев томилогдоһон юм.
- 1995 оной сентябрь һара соо Тоололгын танхим байгуулагдаа юм. Арадай Хуралай байшан соо энэ эмхи зургаан оршодог һэн. Буряадай Арадай Хуралай хороонуудай хандалгаар уласай хуулинуудай проектнүүдэй бюджедэй талаар саг үргэлжэ мэдээсэл үгэхэ ехэ ажал хэгдэдэг һэн, Геннадий Айдаев амаршалхадаа, эмхи зургаанай байгуулагдаһан түүхэ тухай, эхин шатада ямар ажал ябуулагдаһан тухай онсо тэмдэглээ.
Буряадай Тоололгын танхимай түрүүлэгшэ Евгений Пегасовай тэмдэглэһээр, федеральна болон уласай һангай мүнгэ хэр зүбөөр хэрэглэгдэнэб гэжэ шүүмжэлгэ хэгдэжэ байдаг юм. Эндэ хүдэлдэг мэргэжэлтэд дүй дүршэл ехэтэй, ажалдаа тон харюусалгатайгаар хандадаг.
- Манай мэргэжэлтэд саг үргэлжэ дүй дүршэлөө дээшэлүүлжэ, мэргэжэлээ дээшэлүүлдэг, элдэб семинарнуудта, зүблөөнүүдтэ хабаадажа, ажалаа эршэтэйгээр ябуулна. Бюджедэй мүнгэн болон гүрэнэй эд зөөри зүбөөр хэрэглэглэгдэхэ ёһотой. Энэ талаар аргагүй ехэ ажал хэгдэнэ, - гэжэ Евгений Пегасов тэмдэглээ.
Буряадай Арадай Хуралай хороонуудай түрүүлэгшэнэр, мүн тиихэдэ тус эмхиин эхиндэ байһан габьяата хүдэлмэрилэгшэд энэ хэмжээ ябуулгада хабаадаһан байна.
Эгээл эрхим мэргэжэлтэдтэ хүндэлэлэй грамотанууд болон баярай бэшэгүүд барюулагдаа.
Источник: Буряад Уласай Арадай Хурал
Фото: Буряад Уласай Арадай Хурал
