354
Буряад Уласай Толгойлогшо Алексей Цыденов Арадай Хуралай Түрүүлэгшэ Владимир Павловтай хамта Бэшүүр нютагта тамирай байшанай нээлгын баяр ёһололдо хабаадаһан байна. Үшөө хэдэн жэлэй саана нютагай зон Владимир Павловта хандажа, тамирай байшан бариха тухай захиһан юм. Һунгагшадай захяа бэелүүлэгдэжэ, Бэшүүр нютагта спортивна комплекс ашаглалгада тушаагдаа.
«Планета спорта» гээд нэрлэгдэһэн комплексдо бэе тамир хүгжөөхэ бүхы арга боломжонууд зохёогдонхой. 3 мянга гаран дүрбэлжэн метрэй зайда һорилгын танхим, һоригшын таһалга, эмнэлгын таһалга, массаж хэхэ кабинет, бассейн, сауна, эдеэ хоол бариха газар, хубсаһаяа һэлгэхэ таһалга оршоно. Федеральна болон уласай һанһаа 108 сая түхэриг энэ барилгада гаргашалагдаһан юм.
- Һаруул, уужам байшан соо волейбол, баскетбол наадаха, барилдаагаар бэеэ һорихо арга боломжонууд зохёогдонхой. Бассейн, һорилгын танхимууд эндэ бии. Бэшүүрэй аймагта спорт хүгжөөлгэдэ ехэ анхарал хандуулагдана. Залуу үетэн олоор ерэжэ, бэе тамираа һорихо аргатай болобо. Элүүр энхые сахижа, үхибүүдые тамирта дуратайгаар хүмүүжүүлхэ зорилго табигдана. Шанга, хүсэтэй тамиршад эндэһээ гарахань, дамжаггүй, - гэжэ Буряадай Арадай Хуралай Түрүүлэгшэ Владимир Павлов нютагаархидаа амаршалба.
Источник: Буряад Уласай Арадай Хурал
Фото: Буряад Уласай Арадай Хурал
