​Буряад Уласай Хурамхаан нютагта шэнэ һургуули баригдана

Буряадай Хурамхаанай аймагай түбтэ 275 һууритай шэнэ һургуули «Болбосорол» гэһэн үндэһэн түсэлэй хэмжээндэ баригдана. 2021 оной июнь һарада барилгын ажал эхилжэ, 2022 оной дүрбэдэхи кварталда дүүргэхэ түсэбтэй.

Буряад Уласай Засагай газарай Түрүүлэгшын орлогшо Евгений Луковников, ехэ заһабарилгын хүтэлбэриин дарга Анатолий Урбанов болон уласай тээбэриин болон элшэ хүсэнэй сайд Александр Гоге гэгшэд хэгдэжэ байһан ажал шалгаһан байна. 6 мянган дүрбэлжэн метрэй талмайтай һургуулиин байшан долоон блогуудһаа бүридэхэ юм.

Хурамхаан нютагта энэ һургуули ехэ удха шанартай гэжэ аймагай гулваа Леонид Будаев тэмдэглээ. Хурамхаанда хоёр һургуули бии. Хоёрдохи һургуули баригдаһаар зуугаад жэл боложо байна, үмхиржэ, аюултай болонхой, хоёр корпус хаагданхай.

- Мүнөө үхибүүд нэгэ байшанда һурана. Тэндэнь уйтан, хабшуу. Шэнэ һургуули тон хэрэгтэй. Хэдэн жэлэй туршада аймагай захиргаан барилгын ажал эхилхэ талаар түсэл бэлдэһэн байна. Һуралсалай гараха жэлдэ шэнэ һургуули 400 һурагшад орохо, - гэжэ аймагай гулваа хэлэбэ.