​Буряад Уласта наһажаал болон эрэмдэг бэетэй зоной хойноhоо адаглаха ажал хүгжэнэ

Наhажаал мүн эрэмдэг бэетэй зоной хойноhоо адаглаха ажал улас дотор хүгжэнэ. Зэдын гэр-интернат соо 50 хүн иимэ хангалтада хүртэнэ.

Зэдын гэр-интернат соо 1-дэхи мүн 2-дохи бүлэгэй эрэмдэг бэетэй зон ажаhууна. Тэдэнэр бэеэ хангажа шаданагүй ха юм, тиимэhээ тэдэндэ туhа тэдхэмжэ тон хэрэгтэй. Хүн бүхэндэ өөрын эмшэлгын арга мүн эдеэ хоол зохёогдонхой. Энэ ажал "Демография" гэhэн үндэhэн проектын ашаар бэелүүлэгдэнэ.

Эндэхи ажаhуугшад бултадаа нэгэ гэр бүлэ шэнги болонхой. Сүлөө сагаа hонирхолтойгоор үнгэргэхэ гэжэ элдэб хэмжээ ябуулгануудта хабаадана.  Эрэмдэг бэетэй зоной торолтогүйгөөр ябахын тула бүхы хэрэгтэй зохид байдал бии. Тусхай пандус, тиихэдэ газаагуур сэнгэн амархада барюултай зам хэгдэнхэй.  Энэ хадаа "Доступная среда" гэhэн программын хүсөөр бэелүүлэгдэнхэй гэжэ Зэдын гэр-интернадай захирал Ольга Клочихина хөөрэбэ. Мүн лэ грантын мүнгөөр беседкэ баринхайбди гэжэ тэрэ нэмэнэ hэн.

Наhажаал мүн эрэмдэг бэетэй зоной хойноhоо удаан саг соо адаглаха тухай программын түрүүшын үрэ дүнгүүдые Зэдын гэр-интернадай мэргэжэлтэн согсолно.  Дүй дүршэлөөрөө уласайнгаа бусад социальна эмхинүүдтэй хубаалдажа дэлгэрүүлхэ зорилготой.