​Хүдөөдэ аяншалга хүгжөөхэ талаар конференци Буряадта үнгэргэгдэхэ

Буряад орондо “Агууехэ торгон зам” гэһэн аяншалгын долоон хоногой түсэлөөр Бүхэроссиин хүдөөгэй аяншалгые хүгжөөхэ тухай конференци сентябриин 18-20-ой үдэрнүүдтэ үнгэрхэ.

Улаан-Үдэдэ очно болон онлайн-аргаар үнгэрхэ Бүхэроссиин конференцидэ хабаадахыень аяншалгын һалбариин түлөөлэгшэд болон бэшэшье һонирхоһон зон уригдана. Конференци Агууехэ торгон замай долоон хоногой үедэ үнгэргэгдэнэ. Россиин можо хизаарнуудай түлөөлэгшэд хүдөөгэй аяншалгые гүрэн дотор хүгжөөхэ арга боломжонуудые болон тэрэнэй ерээдүйе хэлсэхэ, дүй дүршэлөөрөө хубаалдаха.

Улаан-Үдэдэ сентябриин 18-ай 10.00 сагта Засагай газарай байшанда (318-дахи танхим) конференци нээгдэхэ. Буряадай Толгойлогшо Алексей Цыденов, Ростуризмын түлөөлэгшэд, «Россельхозбанк» бүлгэмэй түрүүлэгшын орлогшо Д.В. Константинов, Хүдөөгэй үүсхэлнүүдые хүгжөөхэ агентствын гол мэргэжэлтэд болон Россиин эгээл гоё һайхан хүдөө нютагуудай эблэлэй юрэнхылэгшэ А.В. Мерзлов, Уласхоорондын этногастрономическа түбэй юрэнхылэгшэ Л.Гелибтерман гэгшэд хабаадаха. Мүн баһа Буряадай хүдөөгэй аяншалгын газарнуудаар – Россиин Буддын шажанай түб Ивалгын дасан, Ута-Булаг аршаан («Хүдөөгэй аяншалгын мастерскойнууд»), Табхар нютаг, Асагадай «Талын нүүдэлшэн» болон Тарбагатайн «Шэмээшэгүүдтэ айлшаар» этнокомплекснууд конференциин айлшадые угтан абаха.