​Буряад Уласта үерһөө хохидогшодто туһа үзүүлэгдэһээр

Буряад орондо үерһөө хохидогшодто туһа үзүүлгэ үргэлжэлһөөр. Дүн хамтадаа 5 сая 560 мянган түхэриг нэмэлтэ түлбэри Хяагтын аймагай ажаһуугшад абаха. Сентябриин 12-то үнгэрһэн Буряад Уласай Онсо байдалые һэргылхэ болон усадхаха гүрэнэй комиссиин ээлжээтэ бэшэ зүблөөндэ иимэ шиидхэбэри абтаа.

- Хүйтэржэ эхилбэ, тиимэһээ түргэн туһа үзүүлхэ хэрэгтэй. Бидэ булта хохидогшодой гарзыень хүсэлдүүлхэ түлбэринүүдые абатарнь, энэ асуудал ходо анхаржа байхабди. Энэ асуудал Буряадай Толгойлогшо өөрөө анхаралдаа абанхай, - гэжэ Буряад Уласай Засагай газарай Түрүүлэгшын орлогшо Пётр Мордовской тэмдэглээ.

Урид Хяагтын аймагай 132 ажаһуугшада дүн хамтадаа 4 сая 800 мянган түхэриг үгтөө һэн. Мүнөө үшөө 12 хэрэгүүдэй дансанууд бэлдэгдэжэ байна. Наушки һууринай, Хоронхой ба Хяагтын Адаг тосхонуудай 77 хүн энэ мүнгэндэ хүртэхэ болоо.

Хяагтын аймагай Наушки һууринда 34 хүн 10-аад мянган түхэриг, 6 хүн - 100-гаад мянган түхэриг ба нэгэ хүн 50 мянган түхэриг түлбэри абаа. Хоронхойдо 31 хүндэ – 10-аад, 26 ажаһуугшадта 100-гаад мянган түхэриг мүнгэн түлэгдөө. Хяагтын Адаг һууринай 34 хүн 10-аад мянган түхэриг туһаламжа абаба.

Аймагта онсо байдалай гурим августын 27-до соносхогдоһон байна.