​Буряадай Яруунын аймагта анха түрүүшынхиеэ шэнэһэн модонууд таригдаа

Буряад Уласай Яруунын аймагай Эгэтын Адаг нютаг шадар «Ой тайга хамгаалая» гэһэн хэмжээ ябуулга эмхидхэгдээ. Энэ буянтай хэрэгтэ ойн ажахын хүдэлмэрилэгшэд болон һурагшад хабаадаһан байна.

Туршалгын хэмжээндэ 12 мянганһаа дээшэ шэнэһэн модохонууд таригдаа.

«Энээнһээ урид нарһанай сагдуулнуудые таридаг байгаабди. Харин манай аймагта ехэнхидээ шэнэһэн модонууд ургадаг. Шэнэһэн модонууд анхан таригдадаггүй һэн, харин «Лесресурс» эмхиин хъүдэлмэрилэгшэд тариха модо ургуулжа шадаа», - гэжэ Яруунын ойн ажахын хүтэлбэрилэгшэ Сергей Самбуев хэлэбэ.

Тиигэжэ хэмжээ ябуулгада хабаадагшад 3 гектарһаа дээшэ газарта модо тариба.

«Мүнөө таригдаһан модохонууд үбэл яажа дабахаб гэжэ харахабди. Һайнаар ургаа һаань, эдэ модонууд саашадаа таригдаха», - гэжэ Сергей Самбуев хэлэбэ.

«Ой тайга хамгаалая» гэһэн хэмжээ ябуулга «Экологи» гэһэн үндэһэн түсэлэй «Сохранение лесов» гэһэн федеральна түсэлэй хэмжээндэ үнгэргэгдэнэ.