​Буряад, Монгол Уласууд худалдаанай-эдэ засагай шэнэ шэглэлнүүдые хүгжөөхэ түсэбтэй

Ородой Холбоото Улас болон Монгол Уласай дипломатическа харилсаанай байгуулагдаһан сагһаа хойшо 100 жэлэй ой угтуулан, Монголтой харилсаанай талаар сайд Даба-Жалсан Чирипов болон Монголой Ехэ Хуралай гэшүүн Унурболор Дамдинсурен уулзаһан байна. Уулзалгын үедэ Даба-Жалсан Чирипов Буряадай Засагай газарай бэлдэһэн хоёр талын эдэй засагай, худалдаа-наймаанай, гуманитарна болон соёлой харилсаануудые хүгжөөхэ талаар стратегическа зорилго болон эдэбхи үүсхэлтэй болн ьэдэниие бэелүүлхэ зорилгонуудтай танилсуулаа.

 «Ород гүрэн-Монгол-Хитад» гэһэн эдэй засагай коридорой, «Один пояс, один путь», «Чайный путь» гэһэн программануудай түсэлнүүдтэ Буряад Уласай хабаадалгын шухалыень Даба-Жалсан Чирипов тэмдэглээ. Эдэ түсэлнүүдтэ гурбан гүрэнэй стратегическа бодолго хараалан, уласай болон хилэ шадарай худалдаа-наймаан, харгын инфраструктура хүгжөөлгэ, эдэй засагай сүлөө дэбисхэр байгуулга хабаадуулагдана. Тиихэдэ сайд хүдөө ажахын һалбарида худалдаа-наймаа эрхилхэ талаар дурадхалнуудые оруулаа: ургаса һайтай хүрэнгэ, үүлтэр һайтай мал ажахы, тэрэшэлэн мүнөө сагта тон хэрэгтэй болоһон COVID-19 үбшэнтэй тэмсэхэ тусхай хэрэгсэлнүүд, ажабайдалай бүхы һалбарида бага авиациин модельнүүд.

Харюудань худалдаа-наймаан болон гүрэнэй-хубиин суг ажал тухай хуулиин түсэлнүүдые байгуулха талаар Ехэ Хуралай ажалай бүлэгүүдэй хүтэлбэрилэгшэ, Буряадтай хилэ нэгэтэй Монголой Сэлэнгын аймагһаа һунгагдаһан Унурболор Дамдинсурен Буряад, Монгол Уласуудай олзын хэрэг эрхилэгшэдэй хоорондо худалдаа-наймаа суг ябуулха тухай хуули тогтоолгын эрхын оршон байгуулха, ажал хэрэгүүдэй хөөрэлдөө эмхидхэхэ, олзын хэрэг эрхилэлгын, гүрэнэй болон хубиин суг ажал ябуулха талаар харилсаа байгуулха гэжэ тэмдэглээ.

- COVID-19 үбшэнэй эдэй засагай хойшолонгуудые амжалтатай усадхахын түлөө, монгол-буряад харилсаанда удха шанартай хилэ шадарай худалдаанай-эдэй засагай, болбосоролой, соёлой һалбаринуудта асуудалнуудые шиидхэхэ хэрэгтэй. Хүгжэлтын шэнэ тенденцинүүдые бүхы шатануудта хараалан, тэрэ тоодо, уласай болон хилэ шадарай, пандемиин һүүлэй ажабайдалда болоһон хубилалтануудта түргэн дадаха шухал, - гэжэ тэрэ хэлэбэ.

Монголой парламентын гэшүүн хоёр талаын олзын хэрэг эрхилэгшэд ажалаа уридшалан ябуулха, пандемиин байдал һажарха гэжэ хүлеэнгү, шэнэ зорилгонуудые бэелүүлхээ, хоорондоо харилсаха, һанал бодолоороо хубаалдахаар, суг хамта түсэлнүүдые бэелүүлхэ, ажалай һууринуудые байгуулхаар бэлэн байха гэжэ онсолоо.

- Хоёр можонууд хоорондоо географиин, байгаалиин-уларилай, худалдаанай-эдэй засагай, этническэ болон соёлой һалбаринуудта олон нэгэдүүлһэн холбоотой, тиимэһээ хоёр гүрэнэй бодолгын дэмжэлгээр, мүнгэ һомололгын, хүнгэлэтэнүүдэй, тэдхэмжэнүүдэй, сүлөө болон гүрэнэй тусхай мүнгэ татабаригүй худалдаанай бүхы арга хэрэглэн, гүрэн доторой нөөсэ, арга боломжоёо хэрэглэжэ, бэе бэедээ туһалха. Асуудалнуудые суг шиидхэжэ, нягта харилсаатайгаар, амжалтатай түсэлнүүдые бэелүүлхын түлөө өөһэдынгөө онсо шэнжэнүдые хараалан, ажаллаха хэрэгтэй, - гэжэ  Унурболор Дамдинсурен тобшолоо.