​Буряадай Хориин аймагай хоёр нютагта мобильна холбоо байгуулагдаа

Буряад Уласай Хориин аймагай Хандагай, Санномыск нютагуудта УЦН 2.0 федеральна түсэлэй хэмжээндэ мобильна холбоогой станци байгуулаа. Мүнөө эдэ нютагуудай ажаһуугшад мобильна холбоотой болон интернедтэй болобо.

«Жэлэй дүүрэтэр Буряад Уласта УЦН 2.0 гэһэн түсэл үшөө 17 нютагуудта бэелүүлэгдэхэ. Хориин аймагай Алан, Булам, Зун-Хурай, Майла, Ониноборск, Нарым һууринууд гар утаһанай холбоотой болохо. Тиихэдэ Баргажанай аймагай Нестериха, Суво, Бабантын аймагта Россошино, Хяагтын аймагай Новодесятниково, Субуктуй, Убур-Киреть, Сэлэнгын аймагай Дээдэ-Сүтэй, Мухар-Шэбэрэй аймагай Хүһөөтэ, Хэжэнгын аймагай Хөөрхэ, Захааминай аймагай Үлэнтэ, Загарайн аймагай Ангир нютагууд холбоотой болохо», - гэжэ Буряад Уласай Засагай газарай Түрүүлэгшын орлогшо Евгений Луковников хэлэбэ.

Эдэ нютагуудта 100-һаа 500 хүрэтэр зон ажаһуудаг. Үсөөн зонтой нютагуудта холбоо бариха операторнуудта ашаг үрэгүй. Тиимэһээ «Устранение цифрового неравенства» гэһэн түсэлэй хэмжээндэ эдэ нютагууд холбоотой болохо.