373
«Буряад үнэнэй» шогуудһаа: сайгаар садаһан Хилтухин
Ахамад тухай дурдалгаһаа
Буряадай мэдээжэ уран зохёолшо, олониитын элитэ ажал ябуулагша Ц.Ж.ДАМДИНЖАПОВАЙ түрэһөөр 110 жэлэй ой гүйсэбэ. “Буряад-Монголой үнэн” сониной редактораар, “Правда” сониной сурбалжалагшаар, Буряадай номой хэблэлэй директорээр, республикын соёлой сайдаар, Монгол орондо СССР-эй элшэн сайдуудай тусхай газарта зүбшэлэгшээр хүдэлһэн намтартай.
Мүнөө Цырендоржи Дамдинжаповай «Нүхэд тухай дурдалга” (1977 он) гэһэн номһоо “Аха нүхэр, ахамад хүн” найруулгын шогтой хэһэгүүдые шэлэн толилбобди.
Сайгаар садаһан Хилтухин
... Хэжэнгын газар нютаг хүрэжэ, Хоца Намсараевай таниха нэгэ айлда хүрэбэд. Хүндэтэй, һонин айлшад бууба ха юм даа. Һайхан сай шанаба, хилээмэ, тоһо, хүшөөһэ, үрмэ табибад. Хүсэд сайлаагүй шахуу байхадаа, Хоца Намсараевичынь орой стакан сай уугаад, түргэхэн садашаба ха. Хэдэн стакан сай уужа, табиһан хүндыень садатараа эдижэ, Данри Хилтухин бүри һүүлдэ сайлахаяа болибо ха. Гэрэй эзэн эхэнэр уурал бааяма обогор табаг тарган мяха энэ үеэр, нохой халхай, хахадтайгаар асаржа табиба. Хоца Намсараев жолоогүй зоогложо эхилбэ.
Тиихэдэнь сайгаар садашаһан Данри Хилтухин нүхэр тээшээ ууртайгаар хараад, “һахалаа хүдэлгэнгүй” һууха баатай болоо бэлэй. Саашаа ябахадаа, бага зэргэ “хяаралдажа”, гүбэр шэбэрхэн гэмэрэлдээ һэн гэдэг. “Сайн һүүлээр үшөө ямар хүндэ табихыень эртээнһээ тухайлха хэрэгтэй. Тэрэшни эли юм гүбэ”, - гээд, Хоца Намсараевич бүри урдаа оруулаагүй һэн ха. Гэбэшье сайн удаадахи хүндын “нюусые” тайлбарилжа үгэһэн байгаа гэдэг.
