​Һунгалтын дүнгүүд

Ээлжээтэ һунгалта түүхын хуудаһан болобо. Энэ удаа Буряадаймнай ажаһуугшадай 44 хуби эрхэтэнэй уялга дүүргэхэеэ һунгуулиин газарта хүрэжэ, дуугаа үгэһэн байха юм. Урдахи 2016 оной һунгалтада хабаадаһан зонһоо 5 хубяар ехэ болоно.

Ород Уласай түүхэдэ анха түрүүшынхиеэ аяар 3 үдэрэй туршада энэ хэмжээ ябуулга үнгэрбэ. Һунгалтын боложо байха үедэ алибаа дүрим эбдэбэ гэжэ 48 гомдолго Избиркомдо ороһон байна. Ехэнхи мэдүүлгэнүүдые КПРФ намай гэшүүд бариба гэжэ онсологдоно. Тиихэдэ Улаан-Үдэ хотын, мүн Хэжэнгын аймагай ажаһуугшадай үгэһэн дуунууд буруушаагдаба.

Һунгалтын дүнгөөр 9-дэхи одномандатна тойрогто «Единая Россия» намай түлөөлэгшэ, Буряад Уласай Спортын болон залуушуулай талаар яаманай сайд Вячеслав Дамдинцурунов ажаһуугшадай 37,43 хуби дуу абажа, илажа гараба. КПРФ намай түлөөлэгшэ Баир Цыренов 19,85 хуби дуу хуряажа, 2-дохи һуурида, харин 3-дахи һуурида 7,4 хуби дуутай мэдээжэ шоумен Сергей Зверев гараа.

- Шиидхэхэ асуудалнууд тоогүй олон даа. Байгал далайнгаа бэрхэшээлтэ асуудалһаа эхилээд, зайгуул нохойнууд, ойн ажахын һалбарида шиидхэгдээгүй хэрэгүүд дүүрэн. Ажаһуугшадайнгаа тала барижа, захиһан захяануудыень бэелүүлхэ гэжэ ажаллахаб, - гээд, Гүрэнэй Дүүмын шэнэ һунгамал Вячеслав Дамдинцурунов дуулгана.

«Единая Россия» намай түлөө Буряадай диилэнхи хуби һунгагшад дуугаа үгэһэн байна. Хоёрдохи һуурида – КПРФ, гурбадахида – ЛДПР гараа. Буряад Уласай Арадай Хуралай һунгамалай эрхэдэ Эржена Чимитцыренова хүртөө. Тэрэ һунгуулиин 15-дахи тойрогто илалта туйлаба.